KRALENDIJK – Boneriaanse Volleyball Bond (BOVOBO) a risibí bishita di e Volleybal Bònt di Hulanda, NEVOBO riba 13 di Desèmber 2020.

Di parti NEVOBO a bini Bonaire, Peter van Tarel kende ta Sportmanager di Desaroyo i Han Abbing kende ta Coach Consultant i FIVB instructor.

E bishita aki tabata a kontinuashon di e kombersashon nan ku a tuma lugá na ougùstùs 2020 na Hulanda entre Gisette Emer ku Jose-Luis Nicolaas di BOVOBO i Michel Everaert, Direktor di Desaroyo I evenemento di NEVOBO.

E motibu di e bishita tabata pa hasi un inventarisashon lokal di nos fasilidat nan deportivo i di nos posibilidat nan pa asina NEVOBO tambe duna un aporte pa sigui desaroyá vòlibòl na Bonaire. BOVOBO den futuro lo mantené sosten di NORCECA, CAZOVA i lo risibí tambe sosten di NEVOBO huntu ku Ministerio di Salubridat Públiko, Bienestar i Deporte di Hulanda.

Durante e siman a hasi bishita na diferente organisashon i fasilidat òf lokalidat rònt Bonaire pa asina inventarisá e posibilidat nan i nesesidat di kada organisashon pa por krea union den desaroyo di vòlibòl na Bonaire.

E biahe pa Bonaire no tabata plania, ora e posibilidat a sali pa NEVOBO bini Bonaire dentro di dos siman NEVOBO a yega Bonaire.

Dor di e tempu kòrtiku i e dianan liber tabata difísil traha afsprak ku tur hende. Pero a logra interkambiá ku entre otro e siguiente persona nan i organisashon nan; Diputado James Kroon i Diputado Nina den Heyer, Jong Bonaire, Coördinator Vakgroep RK Schoolbestuur i SGB.

Posibilidat nan ku BOVOBO & NEVOBO a papia riba dje ta volley na skol, volley den bario, volley na Jong Bonaire, volley komersial i volleyball via federashon. BOVOBO i NEVOBO ta mira e posibilidat nan pa Bonaire profilá ku Beach Volleybal hopi grandi i e enfoke lo bai ta tambe riba Beach Volleybal.

Tambe a hasi un workshop di volleyball ku un par di hóben na Kompleho Deportivo Jorge Nicolaas dia 15 di desèmber.

NEVOBO lo traha un plan di desaroyo pa 4 aña (2020-2024) i lo manda esaki dentro di 3 siman pa evaluashon pa BOVOBO i despues lo presentá esaki na Ministerio di Salubridat Públiko, Bienestar i Deporte na Hulanda. Den e plan aki tambe lo konsiderá e preparashon di e hóben nan di 10 aña bai ariba pa e youth olypmics beachvolleyball na DAKAR 2026.

BOVOBO a logra e último 3 aña nan lo siguiente riba e parti International/Lokal

  • 2017, BOVOBO a representá Bonaire den e Kongreso di NORCECA na Puerto Rico
  • 2018, organisá i host U23 CAZOVA Woman Chamionship
  • 2018, invitá I risibí ámbos presidente di CAZOVA (Mushtaque Mohammed) i NORCECA (Cristobal Marte Hoffiz)
  • 2018-2019, pidi i risibí un entrenadó, Juan Cartagena FIVB Instructor pa diferente preparashon, reorganisashon i e programa eskolar.
  • 2019, NORCECA BEACHVOLLEYBAL Tour na Delfins Beach Resort
  • 2019, BOVOBO a representá Bonaire den Kongreso di CAZOVA na Jamaica
  • 2020, BOVOBO a sigui diferente kurso i workshop via media digital

BOVOBO a logra lokal;

  • 2017-2018/ 2018-2019 BOVOBO a organisá 2 kampionato, di kual e di dos no a logra tèrminá pa e medida nan di COVID-19.
    • BOVOBO a organisá weganan komersial kombiná ku e weganan di Federashon.
    • Na dos okashon BOVOBO a duna bala na tur skol básiko, Liseo I Jong Bonaire i tambe a duna tur dosente i boluntario nan di sport un workshop pa asina por a kuminsá ku e programa eskolar
    • Final di 2019 BOVOBO huntu ku e vakgroep RK Schoolbestuur i Indebon a organisá un torneo eskolar pa e skolnan básiko

BOVOBO a pone Bonaire riba mapa den e mundu di volleybal dor di bai elekshon i awor representá Bonaire:

  • 2018 , drenta direktiva di CAZOVA komo 2nd Vice presidènt (Gisette Emer)
    • 2019, drenta 2 komishon di NORCECA, Gisette Emer ta den e Komishon de Beach Volleyball i Jose-Luis Nicolaas ta den e Komishon di Desaroyo
    • 2020 Bovobo ta forma aliansa ku NEVOBO

BOVOBO ta orguyoso i agradesido na tur ku a forma parti di e famia di volleybal, ku a duna nan aporte e último añanan i lo sigui lucha pa desaroyo i adelanto di volleybal na Bonaire konhuntamente ku tur Organisashon, Boluntarionan, Komersiante nan, Gobièrnu i mas importante tur e deportista nan.

BOVOBO ta deseá Volleybolistanan i Pueblo kompletu felis dianan di fiesta i un próspero aña yená ku bendishon, salú i perseveransia.

Share This
error: Content is protected !!