KRALENDIJK – “Mi ta gradesido pa e tarea ku partido a pone na mi disposishon. Danki pa sostenémi. Ta algu grandi pa mi kumpli kuné pa Boneiru.” Esaki tabata Hennyson Thielman su promé palabranan momentu el a huramentá komo diputado. For di tempu mi tabata na Hulanda, kada bes ta drenta den mi pa regresá Boneiru. E deseo tabata pa por ta serka mi hendenan. Mi tabata sinta wak potrèt di Boneiru. Asina mi a realisá e balor ku Boneiru tin p’ami. Asina e gana pa yega bèk a krese i ku deseo pa regresá i hasi algu. Mi a hasi diferente kos pa yuda aki aya. Aktividat den hóbennan i mas. Mi a drenta polítika i a pensa ku kos lo a kana rápido, sinembargo e ta tuma su tempu. Mi ke yuda kaminda por pa hasi e diferensia. Mi ke yuda e Kolegio Ehekutivo eksistente. E hende mester desaroyá meskos ku ta e kaso, ku e isla tin ta den desaroyo. Huntu nan mester krese. Momentu mi a regresá for di Hulanda mi ta mira edifisionan ta bai haltu loke ta bon. Sinembargo e hende lokal no ta den e desaroyo. E mester bira otro; kaminda e hende tambe mester ta den desaroyo. Mi ke yuda kaminda por pa desaroyo di e hende i Boneiru. E tarea nan ku mi tin i loke ta importante pa mi persona ta; atendé yudansa pa e hende ku debí na e problema di CoViD-19, no tin trabou i mas. Tin un grupo grandi di hende ku no tin entrada. Komienso di 2021 e grupo ta bira mas grandi. P’ami persona ta e promé kos ku mi ke duna atenshon. E hendenan ku no tin trabou mester por yega na pan pa pone riba mesa. Di un òf otro manera nan mester yega na un entrada pa sobrebibí. Nos komo gobièrnu tin e ròl pa yuda pa e hende mantené un entrada, di otro banda pa turista kontinuá ku kontribuí na e bida ekonómiko di Boneiru. Di 2 kos ku mi ta bai atendé ta e área di finansa, no pa Hulanda, sinembargo pa nos tin e kosnan na òrdu pa nos mes. Asina nos por usa nos sèn mas efektivo posibel. Otro kos pa motivá personal di OLB e entusiasmo pa traha pa yega na resultado ku nos ta deseá. Mi ta bai hasi e trabou ku hopi dedikashon pa nos hendenan i e isla di Boneiru”, diputado Hennyson Thielman a bisa. 

Share This
error: Content is protected !!