KRALENDIJK – Edwin (Din) Domacassé resientemente a huramentá komo miembro di konseho insular i awor ta forma parti di e frakshon di MPB. Esaki tabata sa promé palabranan komo Konsehal. “Mi tin hopi aña den polítika, yudando diferente partido den nan kampañanan, sin nunka a ambishoná ningun posishon polítiko. P’esei meskos ku pa hopi hende, pa ami tambe tabata un sorpresa ku partido a aserká mi pa bira miembro di Konseho Insular. Mi ta gradesí partido pa e konfiansa ku a buta den mi. Mi ta gradesí tur hende ku a duna mi nan sosten. Mi ta di akuerdo ku esnan ku ta bisa ku mi no tin eksperensia na e nivel aki. Pero lagami bisa tambe ku mi tin eksperensia riba diferente tereno kumi ta buta awe na disposishon di pueblo di Boneiru. Mi tin e eksperensia di e mucha ku a lanta den un famia polítiko. Esaki a lanta e amor den mi pa polítika i ku e amor akí mi ta bai hasi mi trabou komo miembro di Konseho Insular. Mi tin e eksperensia di mi wela Machi Dodo semper kla pa yuda hende. Ku su ehèmpel, bibu den mi mente,mi ta drenta Konseho Insular. Mi tin eksperensia tambe di hopi aña vigilando i defendiendo nos naturalesa. Komo representante di pueblo mi ta bai vigilá funshonamentu di nos gobernantenan, di nos mes komo miembro, i defendé interes di nos isla. Mi ta un persona krítiko i hustuna mi konsenshi. Lo mi sostené loke mi ta haña ta bon,i mi lo kuestioná loke ta lanta pregunta serka mi. Den e funshon akí mi ta bai pone atenshon spesial na peskeria, agrikultura i naturalesa. Mi ta kere ku nos pueblo tin derecho di sigui disfrutá di tur loke esakinan ta produsí i ofresé. Mi ta kere firmemente tambe ku esakinan mester bai den harmonia ku otro. Solamente ora tin un balansa entrenan, nos por sigui disfrutá di nan den futuro. Mi tin diferente idea kon hasi esaki i ku tempu lo presentá esakinan. Ta un honor pa mi pa representá pueblo di Boneiru den Konseho Insular”, Din Domacassé a bisa.  

Share This
error: Content is protected !!