KRALENDIJK – Direktiva di Movementu Pueblo Boneriano (MPB) ta anunsia huramentashonnan nobo di MPB den Kolegio Ehekutivo i Konseho Insular. Durante e lastu reunion públiko di konseho insular 21 di desèmber 2020 a huramentá komo diputado di e kartera di ekonomia i finansa Hennyson Thielman i dos konsehal nobo pa frakshon di MPB, Edwin Domacassé i Elvis Tjin Asjoe.

Hennyson Thielman durante di e reunion públiko di Konseho Insular a huramentá despues di a risibí sosten unánime di konseho insular. Hennyson Thielman a asumí e puesto aki despues ku èks diputado Elvis Tjin Asjoe pa motibunan personal a tuma e desishon di retirá for di e puesto. Ya pa kasi 2 aña kaba Hennyson tabata fungi komo konsehero di diputado Tjin Asjoe ku ta e mesun kartera ku e la asumí i tabata enbolbí direktamente den desaroyo i maneho di nos isla. Aparte di esaki a duna retiro na dos konsehal pa e frakshon di MPB kual ta Renata Domacassé i Joselito Statia. Nan dos a keda remplasá pa Edwin Domacassé i lider di partido i awor tambe lider di frakshon Elvis Tjin Asjoe, i huntu ku Edison Ellis (lider di frakshon suplente) ta forma e frakshon di MPB.

Direktiva di MPB ta sumamente kontentu i orguyoso ku Gobernashon di Boneiru tin un hóben profeshonal na timon, nos a sa di konosé Hennyson Thielman riba nivel profeshonal i personal i sa ku defakto Boneiru por spera trabounan ku éksito tuma lugá. Nos no ta ekskluí e konsehalnan nobo, Edwin Domacassé tambe un kara nobo pa frakshon di MPB pero ku rais polítiko di famia Domacassé, ku un entusiasmo i plannan grandi pa nos isla. Elvis Tjin Asjoe lider di nos partido tambe ku awor ta forma parti di frakshon MPB a wòrdu pidi pa drenta konseho insular pa netamente trese un balansa i huntu ku su eksperensia yuda duna guia i trese stabilidat. Nos ta sumamente kontentu ku e kambio nobo i ta deseá e miembronan tur klase di éksito ku nan trabou den Kolegio Ehekutivo i Konseho Insular.

Nos di direktiva ta gradisí tambe Renata Domacassé i Joselito Statia pa nan temporada den konseho insular, nan dedikashon i pashon ta di atmirá i sigur nos ta agradesido pa e pasenshi, anochi nan largu, debatenan pa asina semper na nòmber di frakshon MPB yega na e meta komun kual ta adelanto i progreso di nos dushi isla Boneiru.

Share This
error: Content is protected !!