KRALENDIJK – Resientemente akusado Gerbert L. i Aqion J. tabata den sala di korte dilanti di hues, relashoná ku hòrtamentu di 2 kabritu. A diskutí fuerte ku hues, indikando ku ta trata di kabritu sin marka i esei ta nifiká ku e kabritu no tin doño. Aqion J. ta enkarselá den JICN. Emerenciana komo partido perhudiká tambe tabata presente durante tratamentu di e kaso. El a pidi un montante di 360 dòler komo daño di perwisio. No tabatin sufisiente prueba ku ta e akusadonan menshoná a mata e kabritunan ku Emerenciana a haña den mondi. No tin bòn pa ilustrá e gastunan di veterinario. Hues a bisa ku hòrtamentu di kabritu ta parse un kos lukrativo, mirando ku Aqion J. tin kustumber di hasi esaki. No solamente pa kome Aqion J. ta hòrta kabritu. Fiskal mr. Teengs Gerritsen a bisa ku laga ta bon kla; no por kue i mata kabritu ku bo ta pertenesé na boso. Esaki apesar ku e bestia ta den mondi. Ministerio Públiko a demanda un but di 300 dòler pa Gerbert L.. Si no paga esaki e tin ku sinta un kastigu di prison di 12 dia. Pa Aqion fiskal a pidi un kastigu di prizon di 180 dia, di kua 132 dia ta kondishonal i un periodo di prueba di 2 aña. A pidi tambe pa konfiská outo machete i kuchu ku ta pèrtenesé na Agion J.. Abogado mr. Anthony Nicolaas den defensa di su kliente a menshoná ku na Boneiru e hende a kustumbrá i ta pensa si e kabritu no tin marka e no tin doño. Meskos ta e kaso ku un piská. Tambe el a bisa ku e kastigu di fiskal no ta hustu, pues hopi haltu. Hues a splika ku tin hopi kaso di ladronisia di kabritu na Boneiru i ta algu ferfelu. Tur kabritu tin doño. Esun ku no tin marka ta pèrtenesé na e estado. Hues a bisa: ”Aqion J. ta haña un kastigu di 33 dia di prison kondishonal. No ta konfiská su outo, sinembargo e machete i kuchi si. Korte a rechasá e petishon di daño di perwisio.”

Share This
error: Content is protected !!