KRALENDIJK – Dr Willem Cecilia den un komunikado pa Prensa e siman aki ta bisa ku dor ku gastunan di kombustibel pa produsí awa i elekstrisidat na Boneiru a subi, e outoridat ‘Konsumidó i Merkado (Autoriteit Consument en Markt [ACM]) a dekretá e tarifanan máksimo pa produkshon di awa i koriente na Boneiru entrante promé di yanüari 2021.

Mi ta bolbe ripití pa tur hende komprondé e kos sumamente bon. Gastunan pa produsí awa i koriente na Boneiru a subi durante 2020. Tur aña e outoridat Konsumidó i Merkado ta vigilá esaki i ta saka un dekreto ku ta kuminsá konta entrante promé di yanüari di e aña siguiente.

Contourgobal ku ta produsí koriente, i WEB N.V. ku tambe ta produsí un tiki koriente, pero ta produsí i distribuí awa i koriente na final ta disidí e preis difinitivo ku ta bai kobra e klientenan tumando na kuenta e preis máksimo ku a keda dekretá.

Kiku esaki ta nifiká pa Boneiru:

E tarifa di uso máksimo (maximum-gebruikstarief) pa koriente lo subi di 0.23 dòlér pa ora di kilowat (KWh) na 0.26 dòlér. E tarifa di uso máksimo pa Pagabon ta subi di 0.44 dollar pa 0.46 dollar. Pa un kas promedio òf laga nos bisa pa un kas regular esaki ta nifiká un subida di 6 dòlér pa luna.

E tarifa di uso mákismo pa awa di bebe ta subi di 3.77 dòlér pa meter kúbiko (m3) pa 3.81 meter kúbiko. Pa un kas regular esaki ta nifiká un subida di 0.5 dòler pa luna òf mihó bisá un yotín di dòler.

E outoridat konsumidó i Merkado pa medio di su dekretonan ACM/19/035835 i ACM/19/035835 a dekretá e tarifa di uso máksimo pa loke ta trata awa di bebe ku un pipa di ½ duim, i tambe koriente pa loke ta trata e aña 2020 komo lo siguiente:

WEB N.V. a disidí finalmente komo lo siguiente:

Ku eksepshon di Pagabon den aña 2020 ku a risibí un rebaho di 0,0997 pa kada KWh, WEB N.V. a mantené preisnan máksimo pa su klientenan igual ku a keda dekretá pa e outoridat Konsumidó i Merkado.

Ta pronostiká ku den 2021 WEB N.V. lo tuma over e tarifanan máksimo manera dekretá pa e outoridat Konsumidó i Merkado. Ku esaki por bisa ku e preis di awa den 2021 lo subi ku un yotin di dòler pa un hogar promedio i koriente lo subi ku 6 dòler pa luna.

Mester trese dilanti ku WEB N.V. i Contourglobal por pidi supsidio serka e diferente ministerionan pa ku e tarifanan ku ta kobra e klientenan. Den e añanan anterior esaki tambe a tuma lugá. Por konkluí pues ku e preisnan presentá lo ta esunnan válido i final pa 2021. Pa esnan ku ta interesá, por haña e dekretonan di e outoridat Konsumidó i Merkado riba e link aki. E rapòrt na plaka chiki ta splika ta kon a yega na e preisnan máksimo final pa loke ta trata 2021. https://www.acm.nl/nl/publicaties/maximumtarieven-2021-productie-en-distributie-elektriciteit-en-drinkwater-bonaire-saba-en-sint-eustatius

Por último mester lansa e pregunta bálido si na Boneiru tin protekshon legal kontra desishonnan di e outoridat Konsumidó i Merkado. E pregunta ta si.

A base di artíkulo 55 di e lei hurisprudensia pa loke ta trata Atministrashon Gubernamental BES (Wet Administratieve rechtspraak BES), personanan natural òf entidatnan legal, manera deskribí den artíkulo 7, insiso 1 di e lei, ta outorisá pa entregá promé un opheshon por eskrito (bezwaarschrift) serka e outoridat Konsumidó i Merkado kontra e dekreto. Despues ku e outoridat Konsumidó i Merkado tuma un desishon riba esaki, por bai den apelashon na korte.

Share This
error: Content is protected !!