KRALENDIJK – Maduro & Curiel’s Bank (Bonaire) N.V. (MCB), a otorgá premio anual na tres organisashon. Ta trata di Stichting ADRA, Stichting Voedselbank i un grupo di chef, esta un grupo di kòki. Durante e okashon di loke a tuma lugá, den un seno diferente for di e manera kustumbrá, Direktor Gerente General di MCB, Leonard Domacassé, a dirigí palabra pa esnan presente. 

“Manera a bira un tradishon, fin di aña nos ta bini huntu, normalmente den un grupo mas grandi, pa otorgá nos Premio Anual di Mérito.  

E aña aki sirkunstansia a pone ku nos mester a hasi sierto adaptashon, sinembargo apesar di e situashon di CoViD-19 ku nos isla i mundu henter ta konfrontando, tòg nos a haña importante pa bini huntu un momentu i pèrkurá pa duna e mérito bon meresí, naturalmente kumpliendo ku regla di distansia sosial. 

Ken lo por a pensa ora nos a ranka sali aña 2020, ku hopi espektativa, manera por ehèmpel apertura di nos promé ‘Smart Branch’,ku enfoke riba inovashon i mihó servisio, ku nos lo a haña nos konfrontá ku un pandemia, kambiando nos manera di biba, pensa, atendé ku otro i hopi mas.  

Por mira kon vulnerabel nos isla ta, dependiendo práktikamente kompleto riba turismo i kiko e ta nifiká pa nos ekonomia. Medidanan di sosten tuma dor di gobièrnu hulandes i lokal, tambe sektor finansiero, tabata i ta importante pa aliviá e situashon un poko i yuda nos pasa e temporada difísil aki.  

Positivo tabata di mira kon negoshinan tabata apliká kreatividat, implementá kambionan nesesario, enfoká riba efisiensia, produktividat, baha gastu innesesario, digitalisashon, pa sobrebibí e krísis aki. Paso keda sin tuma akshon no tabata i no ta un opshon.  

Pa nos Banko no tabata otro. Nos a mira kon nos organisashon por a adaptá rápidamente na e situashon di krísis, i sigui ofresé e servisio nesesario i tumando en kuenta regla nan di higiena i distansia soshal, nos enfoke mas ku nunka tabata riba nos kanal nan alternativa, manera mashin di ‘swipe’ pa pago na diferente establesimentu i awor posibilidat pa Tap, kaminda bo mes por hasi e transakshon sin tin mester di entrega e karchi, nos ATM nan pa nesesidat di kèsh i tambe ‘online banking’ pa tur pago lokal i internashonal. 

Nos lo sigui traha riba formanan mas avansá i efisiente, pa por ofresé alternativanan ku ta ménos kostoso, pa mas siguridat, fasilidat, i kumbiniente.  

Den e tempunan aki nos ta siñando apresiá e kosnan mas chikí den bida. E brasa ku nos no por duna nos sernan kerí, e sunchi ku nos no por haña di nos amistat nan i e atenshon, solidaridat ku nos ta kustumbrá di dje komo un komunidat chikí. 

Un di nos meta nan prinsipal komo Banko ta servisio na komunidat. Aparte di ta aportá na diferente instansia i inisiativa sosial, tur aña nos ta honra algun organisashon pa nan labor importante na nos komunidat. 

Ku e premio anual di mérito, nos ke iluminá kosnan positivo ku ta tuma lugá den nos komunidat, duna rekonosementu na gruponan ku a duna un aporte importante, i stimulá otro pa hasi mesun kos.  

Awe nos ke honra tres organisashon, grupo, ku a duna, i ainda ta dunando un aporte hopi importante na nos komunidat durante di e pandemia.  

Esaki nan ta: Stichting ADRA, Stichting Voedselbank i tambe e grupo di chef, mihó bisa na bon papiamentu – grupo di kòki. 

ADRA, ta pertenesé na un grupo mundial humanitario ku ta duna ayudo, independientemente di orígen ètniko, afiliashon polítiko òf religioso. Semanalmente ta entrega pakete di kuminda na personanan ku nesesidat. Desde e krísis di Corona, ku a afektá seriamente e sektor turístiko, lamentablemente a mira pobresa oumentá i e nesesidat di alimento krese. ADRA ta duna un aporte balioso riba e tereno aki, sperando ku pronto e situashon por mehorá. Nan dicho ta, i mi ta sita: “Nos lo no stòp ku nos trabou humanitario i aporte na komunidat, tan ten tin pobresa riba nos isla”.   

Voedselbank, fundá na aña 2012, ta apliká un fórmula simpel. Purba tene e organisashon mas simpel posibel, sin muchu limitashon atministrativo, ku e meta pa por dediká mas tempu riba e meta, ku ta distribushon di pakete di kuminda na e grupo di nesesidat riba nos isla. Kolekshon ta keda hasí i aseptá donashon. Tur esaki ta bai bèk pa komunidat, purbando semper pa por tin sufisiente fondo pa kubri minimalmente 3 luna di distribushon. Promé ku Corona, tabata distribuí mas o ménos 100 pakete, pa luna i a mira esaki subi mas ku 300 pakete. Un otro bon inisiativa, hopi importante i nesesario pa nos komunidat. 

Grupo di chef, kòki nan ku ta bini huntu boluntariamente pa kushina pa e grupo ménos pudiente den nos komunidat. Ku kaida di Turismo a bini un ekseso di produkto disponibel pa kuminda, i a bini e idea pa usa esaki pa kushina pa persona nan den nesesidat. E kushina di e restourant ‘Rum Runners’, a bira e sentro durante di e último 9 lunanan, kaminda e grupo ta bini huntu, kushinando mas ku 450 kuminda pa siman. Inisialmente lo a terminá dia 31 di òktober, sinembargo mirando e nesesidat, a disidí pa sigui i awor tèrminá e proyekto awe 29 di desèmber, kaminda e ora ei, ta kushina i entrega en total 13000 kuminda.  

Normalmente nos kolega nan ta skohe un number 1, 2, i 3, sinembargo e aña aki nos no a mira kon lo por a hasi esaki, mirando e trabou sumamente balioso i nesesario hasi dor di e grupo i organisashon nan aki. Pues a disidí pa hisa e donashon i entrega kada un, e montante di $1000, komo nos granito di aporte pa sigui ku e bon trabou.  

Mi ta gradisí i yama masha danki pa bosnan gran labor i kontribushon boluntario na nos komunidat. Boso aporte ta hasi un diferensha grandi pa famianan riba nos isla. 

2021 ta bini ku su retonan i lo no ta un aña fásil, sinembargo nos ta mira esaki ku sierto positivismo. Pronto un vakuna lo ta disponibel riba nos islanan, sperando ku den di dos kuartal por kuminsá mira e efekto mundialmente, tresiendo poko poko sierto grado di normalidat, realisando si ku e bida i manera di operá promé ku CoViD-19, no ta bini bèk. 

Ban resistí mas ku nos por, ban brinda un speransa i un sosten solidario i no bandoná nos soñonan. 

Nos lo biaha atrobe, selebrá bida, kome huntu, kai i lanta, brasa otro, ta nos mes i manera semper; triunfá atrobe… . Nos mihó deseonan; pa huntu realisá un 2021 briante i próspero”, Leonard Domacassé, Direktor Gerente General Maduro & Curiel’s Bank (Bonaire) N.V. a bisa.  

Share This
error: Content is protected !!