KRALENDIJK – Awe djaweps 31 di desèmber, bispu di aña nobo alrededor di 2:35 di atardi, warda di polis a risibí notifikashon ku un aksidente di tráfiko a kaba di tuma lugá riba kaminda djabou na altura di Bario Den Tera. Na yegada di e promé unidat polisial na e sitio a konstatá ku dos outo di famia a dal práktikamente frontal den otro. Di informashon nan kompilá na e sitio por a komprondé ku shofùr di un Toyota Vits biniendo for di Playa direkshon Nort, na dado momentu a bai hasi un u-turn riba kaminda pa stashoná dilanti di su kas. E shofùr a bai hasi esaki sin tuma nota ku un Hyundai Accent tabata aserkando for di direkshon nort ku velosidat haltu. Por a tuma nota ku tabatin marka di brek basta largu ku a keda tras riba kaminda. E choke tabata inevitabel. Despues di e impakto, e Toyota Vits a bai resultá den su propio kura di kas. Daño material ta konsiderabel na ámbos vehíkulo. Ambulans a presentá na e sitio pa hasi un chekeo médiko na e sitio mes riba ámbos shofùr ku tabata keha di dolónan leve. No tabata nesesario bai ku niun persona hòspital. CRS a presentá na e sitio pa registrá e aksidente i atendé asuntunan di seguro.

Share This
error: Content is protected !!