KRALENDIJK – Gezaghèber Edison Rijna a bisa durante un enkuentro ku prensa riba e di 2 dia di 2021; ku aña a habri ku mal notisia pa Boneiru.

“Na promé lugá mi ke deseá boso tur un felis aña nobo i un 2021 kargá ku bendishon, prosperidat i bon salú. Mi ta desapuntá ku aña a habri nos ku e mal notisia, awe tin 17 kaso nobo, hendenan pegá ku Coronovírùs (CoViD-19)  riba nos isla. Na tur tin awor 46 kaso aktivo di CoViD-19 i tambe mi ta menshoná ku a atmití e promé pashènt na hospital pa motibu di COVID-19. Esei ta serio i tin mi preokupá. Enpartikular pasobra tin indikashon ku e vírùs ta serka nos. No ta asina ku ta hende di afó so a bini kuné.  

Den pasado mi a splika vários biaha, ku ta tuma medida mas severo ora e kantidat di kaso nobo di CoViD-19 sigui subi. I nos ta tene kuenta ku e sifranan por sigui subi mas di loke nos a mira den e dianan ku ta tras di lomba. Pasobra awor aki nos no sa ainda kuantu hende a pega ku e vírùs durante kambio di aña.

Ta keda na nos awor pa pèrkurá ku e situashon di CoViD-19 na nos isla no bira dia pa dia mas pió. Nos ta un isla chikitu i nos kuido di salubridat profeshonal ta limitá. P’esei kuida! Kuida bo mes i kuida esnan rònt di bo.  Pa bo mama, tata, tanta, tio wela, amigu i konosínan tur keda seif. Aña pasá na sèptèmber ora nos tabatin basta kaso di CoViD-19, nos a logra kontrolá e situashon hopi rápido. Mi ta konta ku nos por logra esaki e aña akí atrobe”, gezaghèber Edison Rijna a bisa.

Share This
error: Content is protected !!