KRALENDIJK – Hopi reakshon i remarke ya pa un temporada, e asuntu di bochincha di entre otro motosaikel den sentro di suidat, ku ta kousa hopi molèster. A bira kasi un kustumber, ku sierto koredónan di motosaikel ta pasa den kaya i ta hasi hopi bochincha, simplemente pa laga sa ku nan tei.   

Esaki ta un molèster tambe pa turistanan ku ta sinta kome na restorant nan na altura di malekon ku diripiente ta haña nan ku e situashon fastioso ku ta pone nan spanta bastante. Aparte di den sentro di suidat, na Plaza Fraternan di Tilburg, e kiosko ku tin na e sitio, tin hende ta sinta na grupo grandi i kousa sierto momentu molèster, miéntras tin Santu Sakrifisio di misa, ku ta djis pegá ei. Den pasado outoridatnan a move tur hende for di e sitio pero te ainda e rèspèt no tei. Esaki ta sigui normal. Ta pone fever riba e klenkunan i laga un mahos bista atras. Mardugá ta otro storia, poko mas molèster ku entre otro ponementu di fever den kaya, riba Kaya Korona i rondó di e rotònde sùrnan di roozendaal. Diferente bòrchi di tráfiko pone plat, debí na deskuido tras di stür, komo konsekuensia ku ta dal i benta palu i bòrchi na suela. A bira tempu pa polis duna atenshon na e situashon menshoná, loke ta hopi komentá. Aparte di Bonaire, e mes un problema ta manifestá na Kòrsou i Aruba, kaminda polis ta man yen pa frena e problema. Esaki ta notabel ku regularidat den notisia.  

Rèspèt pa kas di Señor  

Parokianonan ta remarká ku no tin rèspèt pa misa. Tur hende práktikamente sa momentu ku tin Selebrashon Eukarístiko i ta komo si fuera e momentu spesífiko, ta esun oportuno pa hasi bochincha den e rotònde di Sùrnan di Roosendaal i besindario. Kisas esnan ku ta manehá e vehíkulo, kousa molèster no ta realisá loke nan ta hasi. Ta  bon pa un konosí, ku si ta rekonosé e molèster, splika nan. Mester tin poko rèspèt pa kas di Señor. Tin hopi otro sitio pafó di sentro di suidat pa hasi bochincha ku ta ménos òf no ta molèster pa otronan. Mes kos ta e kaso na e otro misanan. Entre otro Lèktòr akólito Felix Nicolaas ta sklama pa yudansa di e molèster di bochincha, spesialmente momentu ku tin misa i vehíkulonan ta pasa i hasi bochincha den área di misa San Bernardo. Hopi bia e hendenan no ta sali pone òrdu, debí na miedu di esnan ku ta praktiká e desòrdu, pasobra nan ta agresivo.    

Gezaghèber Edison Rijna tin atenshon  

Gezaghèber Edison Rijna ta na altura di loke ta sosodé i huntu ku polis ta vigilá e situashon di vehíkulonan ku ta kousa molèster den sentro di suidat. Nan ta na altura ku ta trata di motosaikel, kuat, skuter i sierto outo, loke nan mes a señalá. Por tuma nota tambe di grabashon riba media sosial, pone mentu di fever den áreanan poblá. Un koredó di motosaikel konosí na Boneiru, Orlando Francisca a menshoná ku e ta koredó di motosaikel i no por komprondé dikon un persona mester okashoná asina hopi bochincha, ku ta kousa molèster na e hende, spesialmente den sentro di suidat. Mas koredó di motosaikel a konta ku nan ta desaprobá e aktitut di esnan ku ta komportá nan mes di tal forma. No ta tur entre otro manehadó di motosaikel òf outo ta hasi desòrdu hendenan ta menshoná.

Share This
error: Content is protected !!