KRALENDIJK – Mas hende a tèst e último dianan, kompará ku e simannan ku a pasa. Nos a haña mas resultado positivo di e tèstnan. Departamento di Salubridat Públiko ta hasi nan bèst, pa haña bon bista di e kasonan. Esaki ta loke Marian Luinstra-Passchier a bisa durante un enkuentro ku prensa riba e di 2 dia di 2021.  

“Hopi hende a keda kana ku keho i no a bin tèst. Awor ta sali na kla ku nan a pega ku e vírùs. Tabatin hende ku a pensa ku Coronavírùs no ta na nos isla. P’esei nan no a hasi tèst. 

E siman akí 46 persona a tèst positivo. Por mira kon e delaster simannan a bai den e plachi.  

Pa investigá e fuente i kontakto ta tuma hopi tempu i trabou. Nos deseo ta pa evitá ku e vírùs ta sigui plama. P’esei nos ta yama e personanan ku un hende ku a pega ku e vírùs tabatin kontakto kuné i pone nan den karentena. Si nos yamabo pa bai den karentena, hasi esaki. E ta importante pa protehá e personanan rònt di bo. P’esei ta importante pa yama asina bo tin keho. Mas rápido nos sa ku abo a pega ku e vírùs, mas mihó esei ta. Asina bo ta evitá ku ta kontagiá otronan.  

E vírùs di Corona ta aktivo na Boneiru. Naturalmente  el a bini di eksterior. Sinembargo awor e ta bou di nos. Nos ta mira ku mas hende ta pega ku e vírùs. E vírùs por plama, pasó hopi hende no ta tene nan mes na instrukshon di higiena, òf no ta wòri mes ku nan. Tin hende ku no tin kunes mes. E sifranan ta mustra resultado di esaki. Nos no por hasi manera e vírùs no tei na Boneiru. E tempu di no wòri a pasa. Si bo tin keho ku por tin di aber ku Coronavírùs, no kana rònt kuné. Keda kas i yama 0800-0800 pa traha un sita pa tèst”, Marian Luinstra-Passchier a bisa.

Share This
error: Content is protected !!