KRALENDIJK – Promé djadumingu di 2021, Pader Alphonsus Baak, a selebrá huntu ku parokianonan e di kuater Santu Sakrifisio di misa di e aña, na parokia La Bírgen Maria di Coromoto. Entre otro el a menshoná durante predikashi ku un iglesia no ta para ketu. “Nos huntu tin ku move pa yega serka Hesus. Ta importante pa kada un di nos buska un persona, invit’é pa bai misa. Tene su man i gui’é pa e ta felis”, Pader Baak a bisa.

E siman aki ta último siman ku Pader Baak ta na misa La Bírgen Maria di Coromoto. Djabièrnè 18 di sèptèmber e informashon a sali ofisial, ku pader Baak ta bai biba Kòrsou. Di tur manera tabata un baño di awa friu pa hopi hende. Apesar ku pader Baak a menshoná:”No pega na pastor, sino na e palabra di Dios.” Hopi hende no a sinti nan bon ku e desishon di obispado i a ekspresá nan malkontentu riba retnan sosial. Dikon ta pader Alphonsus Baak ta bai i no un otro? Esaki ta e pregunta ku ta biba serka parokianonan na Boneiru. Nan ta di akuerdo ku Pader Baak a hasi hopi e último añanan pa e iglesia entre otro pa trese parokianonan bèk na santu sakrifisionan di misa. Pader Alphonsus Baak a hasi hopi bon trabou na bienestar di iglesia katóliko na Boneiru. No ta nifiká ku kos no tabata bai bon den pasado, sinembargo el a pèrkurá pa stabilidat. Pader Baak ta fuerte, luchadó i no ta aseptá kiko ku ta, for di ken ku ta! Asina e ta! Di e manera aki e ta funshoná tur kaminda. Si mester sali pa bisa algu, e ta hasié sin dal niun stap patras! Dilanti ta bai. Esaki ta un di e motibunan ku hopi hende ta siguié, aparte di su manera di prediká. Tur siman hende ta komentá, awor mas ku nunka, tokante  di Pader Baak su estilo di hasi misa. E siman a yega ku Pader Baak tin ku bai.

Pader Marc Hooijschuur ta bini Boneiru for di Kòrsou i ta kontinuá ku Selebrashon Eukarístiko pa Parokia di Coromoto. Despues di 5 aña trahando komo pastor den parokia di Santa Famia, entrante 11 di yanüari 2021 e ta kuminsá un kapitulo nobo na Boneiru. Mgr. Luis Secco a pidie pa tuma e tarea komo pastor di parokia di La Birgen di Coromoto i komo kapelan di instituto hudisial Hulanda Karibense na Boneiru. Pader Hooijschuur na algun okashon tabata na Boneiru i a remplasá Pader Alphonsus Baak kende tabata den eksterior. Entre otro parokianonan di La Bírgen di Coromoto a apresiá mashá Pader Hooijschuur ku selebrashon nan di Santu Sakrifisio di misa. Pader Baak ya a menshoná na diferente okashon, entre otro ku pader Hooijschuur ta bon pastor, mes un tipo di hende manera e. Parokianonan por ta trankil i sigur ku nada no ta bai kambia na misa.    

E siman aki ta último siman ku Pader Baak ta selebrá Santu Sakrifisio di misa ku parokianonan di La Bírgen Maria di Coromoto i komienso di otro siman, pader Marc Hooijschuur ta kontinuá. Pader Baak ta bai Kòrsou pa e ta mas serka di Obispu Luis Antonio Secco, entre otro pa atendé ku relato finansiero di Diósesis di Willemstad. Pader Baak ta bai atendé ku no ménos ku tres misa den e área di Banda Bou, entre nan ta rekerí trabou di mantenshon, loke Pader Baak ta gusta i ta kordin’é hopi bon. Esaki ta algun di e motibu nan spesífiko ku Obispu a tuma e desishon pa manda pader Baak Kòrsou. Den pasado el a traha hopi aña na Kòrsou, pues e tin hopi konosí aya.

Hopi trabou tabatin na misa, sinembargo falta mas, loke pader a bisa durante Santu Sakrifisio di misa. “Ami ta bai sinembargo Marc Hooijschuur, ta sigui i e tin e mes un pensamentu ku mi persona. Pues tur kos ta keda meskos”, Pader Baak a bisa.  

Pader Marc Hooijschuur entrante 11 di yanüari 2021 ta kuminsá un kapitulo nobo na Boneiru.
Share This
error: Content is protected !!