Kralendijk – Union Patriotiko Boneriano a emití un karta dirigí na minister di Salubridat di Hulanda. Den e karta aki UPB ta pidi pa na momento ku Boneiru ta na turno pa risibi e bakuna, pa organisa e proseso mas efektivo posibel, teniendo kuenta ku e kantidat relativamente chikitu di habitante ku ta biba riba nos isla.

E posishon aki tuma pa UPB, ta debi na e echo ku nos ta kompronde ku e bakuna ta e uniko remedi eksistente pa kontraresta kontagio i plamamentu di e viro. Esaki pues ta duna espasio pa poko poko pero sigur, Boneiru por kuminsa drai di forma normal atrobe, dunando un i tur e oportunidat pa sigi traha riba nan metanan personal i e desaroyo general di Boneiru.

Nos ta konsiente ku tin individuo i gruponan den nos komunidat, ku tin nan reserva pa ku akseptashon di e bakuna. Esaki naturalmente ta kos di respeta. Nos ta biba den un país liber kaminda tur hende tin e derecho di ekspresa nan mes i tuma e posishon ku nan ta kere den dje. Komo organisashon politiko sinembargo, nos di UPB mester wak i guía deserayo general di Boneiru. Nos ta respeta tur opinión, pero nos ta para riba e siguiente punto; “Boneiru ta un isla den laman Karibe ku ta depende di influensia djafo pa su desaroyo. Esaki ta trese kune ku nos no por permiti pa nos wordu isola of keda para manera ami so den boso”. Esaki lo ta un akontesimentu funesto pa nos tur.

A base di e pensamentu aki, kombina ku e konfiansa den integridat di e kompanianan produktor di e bakunanan aproba i den e proseso estrikto di testing i aprobashon di e seguridat di e bakunanan, nos a pidi minister di salubridat pa duna Boneiru e oportunidat pa mas rápido posibel e kuminsa karga su mes peso bek. Esaki ta nesesario pa nos por sigi ku nos proseso di desaroyo inisia.

Di parti di e minister, nos a kompronde for di un komunikado, ku e konseho di seguridat hulandes a duna su punto di bista ku e bakuna lo ta disponibel pa Boneiru, na mes momento ku esaki ta disponibel pa Hulanda Europeo. Esaki ta algu di aplaudi ja ku e ta kita tur posibel diskushon tokante di ken ta suidadano di prome of di dos nivel. Nos sin embargo ta mas interesa den un kontesta riba e efektividat di e bakunashon. Mester ta posibel pa bakuna 21.000 habitante den algún siman. Di e manera aki tur habitante por sigi traha riba nan desaroyo personal i desaroyo di Boneiru den su totalidat.

Share This
error: Content is protected !!