KRALENDIJK – Ku lágrima pader Alphonsus Baak, a baha for di altar, miéntras parokianonan tabata seka awa di wowo ku lensu djadumingu mainta 11’or. Tabata un momentu di emoshon. Esaki ta debí pader Baak ta bandoná Boneiru i bai biba Kòrsou. “For di momentu ku mi a yega Boneiru, mi a sintimi na kas i aseptá na parokia La Bírgen Maria di Coromoto. Mi ta kòrda algun dia despues na Boneiru, mi kuminsá kibra muraya pa trabou di mantenshon i hendenan tabata puntra; ta kiko ta bai sosodé? Hendenan no tabata konosémi. Mi a bini for di Sürnam. Hopi trabou mi a hasi durante 7 aña ku mi ta na Boneiru komo pader. Awor mi ta bai Kòrsou i mi ta laga boso den man di pader Mark Hooijschuur. Mi ta bai atendé ku 3 parokia na Kòrsou aya na Westpunt”, entre otro pader Baak a bisa. Durante misa un mucha a risibí promé Santa Komunion i djis promé ku misa a kaba, sirbidónan di misa a entregá pader Baak, un leshi ku e 23 sirbidónan di misa ariba. Despues di e momentu, Maritsa Silberie a dirigí algun palabra di gradisimentu i pader Baak a finalisá ku último palabranan; kasi no por a papia. Palabranan a sali ku hopi emoshon i sin tèrminá. Emoshon no a pèrmití pa mas palabra sali for di pader Baak, den presensia di parokianonan. Djamars 12 di yanüari ta último misa afisiá pa pader Baak na Boneiru. Kombinashon di potrèt ta ilustrá e momentunan.

Share This
error: Content is protected !!