KRALENDIJK – Djabièrnè último, gezaghèber Edison Rijna a papia ku komunidat tokante situashon i kantidat di hende infektá ku CoViD-19. “E kantidat di kaso aktivo di CoViD-19 djabièrnè 8 di yanüari a oumentá i yega e total di 100. Pa djasabra a bini un kaso mas aserka. Esaki ta alarmante. Mi a tuma nota ku den pueblo tin hopi hende preokupá. Pa e motibu ei mi ta dirigí mi mes na boso awe.    

Di un banda e sifranan a subi komo ku ta di lamentá ku  no ta tur hende a tene nan mes na e reglanan. Di otro un banda tin muchu mas hende ku a bai tèst resientemente. Mi ta kontentu ku esaki pasobra esaki ta duna un mihó bista riba e kasonan aktivo. Nos ta tene kuenta ku e sifranan lo por sigui oumentá.  

Departamentu di Salubridat Públiko ainda ta investigando tur kontakto i fuente di kontagio di hendenan ku a pega ku e vírùs. Pues no ta konosí ainda si tur kaso tin di aber ku e clusternan konosí. Aparte di esaki tin cluster nobo tambe, manera esun di ‘Tronco Snèk’.  

Tene kuenta ku nos ta monitoriá e situashon di dia pa dia. Si  e kasonan sigui oumentá i nos no tin un bista klaro di e fuentenan di kontagio, lo bini mesora ku medida mas severo.    

Manera mi a menshoná promé ku e tempu di atvertí a pasa i awor ta na nos mes pa evitá di ta un peliger pa otro. Pues un biaha mas mantené na medidanan konosí i hala atenshon di esnan ku no ta kumpli ku e reglanan. Di nos parti direktorado di Supervishon i Mantenshon huntu ku kuerpo polisial di Hulanda Karibense lo hiba e kontròlnan i duna but na esnan ku no ta kumpli. Ta un  siudadano responsabel i kuida”, gezaghèber Edison Rijna a bisa.

Share This
error: Content is protected !!