KRALENDIJK – Djabièrnè último, gezaghèber Edison Rijna a papia ku komunidat tokante situashon i kantidat di hende infektá ku CoViD-19. “Mirando e kantidat di 100 kaso aktivo ku nos tin, a skohe pa tuma medida nobo pa evitá formashon di grupo grandi.  Nos ta hasi esaki komo medida di prekoushon i pa protekshon di un i tur. 

Ministerio Públiko a informá mi tambe ku lo bai aktua severo kontra tur hende den grupo grandi. E tempu di atvertí i hala atenshon di hende ku ta aglomerá a pasa. Si no kumpli ta haña but! Esaki ta konta tambe pa establesimentu ku no ta kumpli ku e regla. 

Entrante djasabra 9 di yanüari 2021, ta pèrmití pa hende di maksimal dos kas tene un enkuentro privá na kas òf den espasio públiko.  

Na evento profeshonal por okupá 50% di e espasio i por tin un máksimo di 25 hende. Pa un evento profeshonal mester pidi i haña pèrmit. Mester registrá ken ta presente i no ta permití pa kanta òf balia.  

Den establesimentu di hóreka ta pèrmití un máksimo di 4 hende na kada mesa, mucha mas yòn ku 13 aña  no ta inkluí. E establesimentunan mester usa un máksimo di 50% di nan kapasidat, bishitante ta sinta na un lugá fiho i e lugá mester sera 10 or di anochi.  

Tienda i pakus por keda habrí, ta pèrmití un máksimo di 2 hende di kada kas pa hasi kompra. Por tene misa òf sirbishi. Ta konsehá urgentemente  pa  usa 50% di e kapasidat i tur hende sinta na un distansia di 1,5  mei di otro. Mirando kuna un iglesia tabatin hende ku a pega kue vírus, ta urgí tur misa i iglesia pa no kanta durante misa òf sirbishi. Tambe pa tur hende bai kas asina ku e misa òf sirbishi a kaba.  

No ta pèrmití pa tene kompetensia di deporte, i mester bai kas mesora despues di praktiká deporte.  Skol di deporte por keda habrí basta nan tene nan mes na e reglanan estrikto ku a palabrá ku nan. Nan tin mag di tin 50% di e kantidat di hende ku normalmente por praktiká deporte serka nan.   

Ta urgí tur hende pa traha mas tantu posibel na kas. Trahadó den un profeshon di kontakto manera hasidó di kabei, hasidó di uña, fisioterapista, mester bisti tapa boka. 

Tur diskotèk, i kas di plaser ta keda será. Kasino, teater di sine i sauna por keda habrí. Esaki pasobra den e establesimentunan akí bishitante no tin masha kontakto ku otro, manera ora hende ku konosé otro bini huntu na un kas porehèmpel. E establesimentunan menshoná tin mag di tin 50%  di hende ku e lugá por karga normalmente. 

Tur skol i akohida pa mucha ta keda habrí. Na skol i akohida pa mucha tur adulto mester tene 1,5 meter di distansia di otro.  

Manera semper mi ta bolbe enfatisá importansia di tene 1,5 meter di distansia, laba man regularmente i tosa i nister den boèlebog. Tur mester asumí nan responsabilidat pa kumpli ku e reglanan i evitá ku e vírùs ta sigui plama bou di nos. 

Manera mi a menshoná promé ku e tempu di atvertí a pasa i awor ta na nos mes pa evitá di ta un peliger pa otro. Pues un biaha mas mantené na medidanan konosí i hala atenshon di esnan ku no ta kumpli ku e reglanan.  Di nos parti direktorado di Supervishon i Mantenshon huntu ku kuerpo polisial di Hulanda Karibense lo hiba e kontròlnan i duna but na esnan ku no ta kumpli. Ta un  siudadano responsabel i kuida”, gezaghèber Edison Rijna a bisa.

Share This
error: Content is protected !!