KRALENDIJK – Trahadónan den enfermeria ya a kuminsá risibí Bakuna kontra Coronavírùs aya na Hulanda. Esaki a sosodé durante e promé siman di 2021. Media hulandes a informá ku djaluna siman pasá, minister di Salubridat Públiko na Hulanda Hugo de Jonge, a entregá Tweede Kamer un plan pa e bakunashon di komunidat hulandes. Den e plan ta poné ken ta esnan promé ku ta bin na remarke pa haña e bakuna i e momentu. Trahadónan den enfermeria, kasnan di kuido, empleadonan ku ta traha riba ambulans ta esnan kende promé ta risibí e bakuna. Segun e minister, den e di tres kuartal di 2021, tur hende na Hulanda lo ta bakuná kontra Coronavírùs. E proseso ta ku ta pasa e hende e bakuna 2 bia. Un awor i e di dos bia ta despues di tres siman. E grupo aki ta risibí e bakuna di ‘Pfizer’ i esaki ta duna den hòspitalnan. E di dos grupo ku ta esnan ku ta traha den kuido lo risibí e bakuna na luna di aprel pa ougùstùs. Hendenan entre edat di 18 pa 60 aña i ku tin malesa króniko ta risibí e bakuna mas trempan posibel, entre febrüari pa sèptèmber. E grupo aki ta risibí e bakuna ‘AstraZeneca’ i nan por hañ’é serka nan dòkter di kas. Gobièrnu hulandes ta konsiente ku tur hende ta deseá pa mas rápido pa risibí e bakuna, sinembargo mester hasié di tal forma ku ta baha e preshon den kuido por ehèmpel hòspitalnan. E kos ta ku tur hende ke bai den e bida normal manera kustumbrá. Segun e plan di Hulanda, den e promé fase, t’asina ku 269.000 trahadónan den enfermeria lo keda bakuná, 178.000 trahadó den kuido di hendenan ku desabilidat físiko lo haña e bakuna i despues e trahadónan di kuido ku ta duna kuido na kas, ku ta mas o ménos 166.000 i 30.000 ku ta traha den e departamentu di Coronavírùs den hòspital. Tur ta haña bakuna ‘Pfizer’. Habitantenan di kas di kuido 147.000 i 85.000 di pashènt ku ta mentalmente limitá ta risibí e bakuna di ‘Moderna’. Manera ta konosí, e bakuna di ‘Pfizer’ mester ta den un temperatura di 75 grado bou di sero i pa e motibu aki mester di frizernan spesial. 

Share This
error: Content is protected !!