KRALENDIJK – E kompania di aviashon lokal EZ Air ta bai amplia su flota ku mínimo dos avion mas. E kompania di EZ Air ya tin 2 avion tipo Beechcraft ku un kapasidat di 19 stul kada un. Aparte di nan 2, tin tambe un avion tipo Britten-Norman Islander ku por karga 9 persona abordo. Awor e kompania ta bai amplia ku dos avion mas den mitar di 2021. Ta trata di dos avion tipo Saab 340 ku kapasidat pa karga entre 20 pa 50 pasahero. E plan tabata kanando for di promé ku e problema di pandemia di CoViD-19 a presentá den e region aki. Esaki ta loke CEO Rene Winkel a bisa.

Winkel a bisa apesar di e situashon aktual di e pandemia, tabata notabel un nesesidat pa amplia e flota. E ruta entre e islanan ta rekerí mas stul. E ruta entre Boneiru i Sint Eustatius, tin bia ta rekerí mas espasio pa transportá maleta. Esaki tin di aber ku e peso riba e avion i mester laga algun maleta for di e buelo. Esaki no ta un sentimentu dushi pa ámbos, esta e biahero i e kompania di biahe. E ampliashon ku 2 avion mas pa e kompania, ta duna espasio pa amplia i bula mas destinashon den e region. Tin plan pa mas avion pa e kompania dependé kon kosnan kana. Por amplia ku por lo ménos 5 avion i e plan ta pa bula por lo ménos 10 destinashon regional. 

KAMBIO GRANDI         

Un kambio grandi pa e kompania EZ Air i tambe pa pasaheronan lo ta ku e avionnan nobo lo tin personal di kabina abordo. Avion di entre 20 pa 50 stul mester tin un steward òf stewardess na bordo en bista di seguridat di buelo. Presensia di personal di kabina ta hasi posibel tambe pa parti kos di kome i bebe na pasaheronan riba buelonan ku destinashon mas largu. Esaki ta loke Sueyenne Dammerman, kende ta direktor komersial di e kompania a bisa. El a traha den pasado komo stewardess pa e kompania Air Aruba. EZ Air durante e último 2 aña ku a pasa, a hasi hopi invershon i kambio den nan sistema di e kompania. Entre otro; sistema pa reservá pasashi i chek in pa medio di Internèt i ta transportá hopi karga. Pensioenfonds Caribisch Nederland (PCN) ta e fuente finansiero mas grandi di e kompania. E kompania EZ Air, apesar di e temporada fastioso, nan a sobrebibí entre otro hasiendo buelo di charter i transportá karga. Esaki sigur nan ta kontentu kuné i por a pasa i ta pasando e temporada finansieramente bon i ku e mira pa ekspanshon.

Share This
error: Content is protected !!