KRALENDIJK – Suidadano Arthur Sealy ta trese algun punto dilanti relashoná na CoViD-19. “Responsabilidat ta e palabra ku ta bini ku frekuensia dilanti den mensahenan di gezaghèber. Ta nifiká ku ta pa motibu di iresponsabilidat e kasonan di CoViD-19 ta oumentá. Mustra solamente riba e reglanan; tene distansia, no aglomerá, laba man ku habon, tosa den kokoti, bisti tapaboka, drumi na tempu, hasi ehersisio i kome salú no ta kambia komportashon di hende. E palabra mas importante ta aglomerashon. Tira un bista na snèk i barnan pa wak kon e komportashon ta i no lubidá e festinnan klandestino. E punto ta, mi ta keda ripití, ku mester di un profeshonal pa kambia un hende su aktitut pa e komportá i kurashá otro pa komportá manera outoridat ta pidi. Miedu ta dominá e desishon pa hasi algu korekto i ta keda tira falta riba otro. Awor ku tin un bakuna mester di un profeshonal pa splika esnan ku no ta kere den bakuna e benefisio si tuma e bakuna. Si Entidat Públiko Boneiru no tuma un profeshonal riba tereno di komportashon ta nifiká ku EPB tin mes miedu ku esnan ku no ta tuma kontakto ku GGD. Mi ta sita Albert Einstein: Dos kos ta infinito, Universo i Bobedat. Di Universo mi no ta totalmente sigur”, Arthur Sealy a bisa. 

Share This
error: Content is protected !!