KRALENDIJK – “Un deseo di bon aña i pronto rekuperashon nan tur pashènt di Covid-19 ta na su lugá. Ta un deseo berdadero nada di tradishon di djis bisa bon aña i tur kos bon.” Asina e konosido suidadano Arthur Sealy a kuminsá su artíkulo riba algun tópiko.

“Ta duele di mira resultado di iresponsabilidat di nos hendenan relashoná ku plamamentu di Covid-19. Den henter e asuntu di Covid-19 mi a tende komentario i sugerensia kon hisa bo resistensia i e palabra mágiko ku tur hende a usa ta kuida. Gezaghèber Edison Rijna i Marian Luinstra-Passchier, ta duna informashon sumamente komprendibel pa evitá mas kontagio, Sinembargo nos sa mihó i ta sigui e teoria di kòmplòt ku ta otro i no nos.

Si te ainda nos no ta kere ku mester di un sosiólogo pa mustra kon mester anda ku komportashon di hende e asuntu di bakuna ta bai bira un problema na Bonaire. Nos ta na altura kon e pensamentu tokante e bakuna ta? Kon ta influensiá esnan ku ta kontra? Logístikamente mirá tin basta trabou pa hasi i si tur kos kana bon por kuminsá sigur den fin di febrüari kuminsamentu di mart.

Mi ta keda positivo i skirbi tokante algun hende ku ta karga responsabilidat pa Bonaire ta bon protehé. Mi a sigui tur reunion ku a trata e medidanan di urgensia. Konseho Insular mester a kohe e zuai i ta hasié na e manera korekto. Mi no ta duda ku tin krítika tambe riba kon e reunionnan a bai. E diskushonnan den Konseho Insular tabata hopi alkaso i tabatin sufisiente espasio pa hasi polítika i ponensianan fuerte te rant di ta personal. Tres persona na konsepto a sobresalí i nan ta; Gezaghèber komo presidente di Konseho Insular i e konsehalnan Renata Domacassé i Clark Abraham. Mi sa ku tin keho riba Clark su forma di presentá su puntonan, pero p’ami esaki ta trabou di un konsehal, bai te na e límite ku riesgo di bai den ”kòrá” loke a pasa tambe. Renata semper tabata trankilo i na un manera korekto bon argumentá ku e pensamentu ”mi no sa tur kos” pero  mi ta abrí pa otro pensamentu. Renata tambe su pasenshi por kaba i “blousá” wowo di un kolega pa poné na su punto. Gezaghèber tabata dirigí e reunionnan na un manera demokrátiko, espasio pa tur pensamentu i fuerte den defendé su ponensianan ku argumentonan bon fundá. Mi ta kompará Gezaghèber ku un dosente dilanti di un klas trabahoso. Te ainda e tin e klas bou di kontròl, ounke tin biaha konsehal Bernabela a pidi presidente pa pone òrdu.

Mi tabata mira den Edison Rijna, Renata Domacassé i Clark Abraham. E personanan di aña, te na momentu ku mi a lesa tokante Nathanael Zimmerman su kreashon úniko. Nathanael Zimmerman ta un studiante di MBO mashá talentoso. Den dia e ta sigui e estudio Allround Vakkracht onderhoud- en klussenbedrijf (Profeshonal multi-uso di empresa di mantenshon i reparashon) na nivel 3 i anochi e ta okupá komo empresario kreativo. Riba Facebook i Instagram por mira su bunita kreashonnan bou di e nòmber Nata Skills. Nathanael p’ami ta e persona di aña”, Arthur Sealy a bisa.  

Share This
error: Content is protected !!