KRALENDIJK – Curoil tin retraso di mas ku 330 bòm di gas ku no a keda entregá. Esaki ta mas o ménos 200 kliente ku ta sperando loke ya nan a paga p’e. Radio Live 99.9 FM a papia ku bosero di Curoil, Sabine Curiel, kende a duna un splikashon.

“Nos a kuminsá 2021 bèrdat ku un situashon kaminda tin un retraso pa loke ta trata bòm di gas na Boneiru. Ta mas o ménos 332 silinder pa mas o ménos 200 kliente. Ya mas ku 2 siman a pasa ku nan no a risibí silender di gas. Nos meta ta for di un temporada kaba, pa entregá silender di gas denter di 2 siman.

E retraso den entrega tin di aber ku entre otro e pandemia di CoViD-19. Diferente empleado a bai den karentena i apesar ku a buska otro hende pa sigui ku e trabou, e proseso ta bai slou. Esaki ta debí ku mester siña e hende nobo kon ehekutá e trabou. A surgi un tardansa tambe den gas ku tabata na Kòrsou ku mester a yega Boneiru. E situashon ta bou di kòntròl i no tin skarsedat di gas na Boneiru. E situashon di personal a stabilisá i si tur kos kana bon, pronto ta repartí tur loke mester bai pa kliente, ku un durashon di 2 siman. E retraso no solamente tin di aber ku no a entregá silender di gas. Tin otro situashon entre otro ku no por a entregá gas debí ku no tabatin hende na kas momentu ku a bai hiba e silender di gas. No por a drenta pa motibu ku porta di kurá ta na lòk, tin kachó òf e bòm di gas no ta bashí ainda. Tur esaki por ta un motibu.

Di e persona ku a trese su reklamo na radio Live 99.9 FM, ya nos a entreg’é bòm di gas mesun dia i bèrdat el a warda hopi promé ku esaki a sosodé. Nos ta pidi nos diskulpa. Tin mas hende ta sperando i nos ta bai hasi tur posibel pa mas rápido entrega tur hende nan silender di gas”, Sabine Curiel a bisa.

Share This
error: Content is protected !!