KRALENDIJK – Elvis Tjin Asjoe a bisa Radio Live 99.9 FM, apesar di a kuida bon, tòg el a pega ku e vírùs. Manera ta konosí frakshon di MPB kompletu ta den isolashon. Ta trata di Din Domacassé, Edison Ellis i lider di frakshon i alabes lider di e partido Elvis Tjin Asjoe. Radio Live 99.9 FM a papia ku Elvis Tjin Asjoe tokante e situashon. El a papia tokante su situashon di kurpa personal i el a bisa ku tin mehorashon di loke e tabata algun dia pasá.

“E otro koleganan, Domacassé tambe a tèst positivo pero no tabata tin niun sintomá. Ellis si a konstatá un situashon poko fastioso di su salú, sinembargo danki Dios e ta rekuperando. Reunionnan di komishon ta kontinuá normal entre otro esun di atendé ku e asuntu di CoViD-19. Pa loke ta trata Reunion públiko di parti di MPB, nos lo no por ta presente. Enberdat ta’sina ku diputado Hennyson Thielman tambe ta den karentena despues di tabata tin kontakto ku mi persona, sinembargo el a tèst negativo. Diferente persona mas a tèst i nan no tin e vírùs.

Tin indikashon ku mi persona a pega komo promé hende ku e vírùs, sinembargo esaki no ta probá. Mi no a bai niun fiesta òf serka hende den grupo. Solamente hende tabata bishitami na kas i tabata bini un pa un. Kisas mi a bai un kaminda ku un hende ya a pasa i asina mi a haña e vírùs. E por sosodé kaminda un persona ku e vírùs a mishi un kaminda i despues bo ta pasa i por haña e vírùs di e forma aki. Sinembargo tur hende tin ku protehá nan mes mas tantu posibel, pasobra e vírùs ta pega na hende relativamente fásil”, Elvis Tjin Asjoe a bisa.  

Remarkabel ta ku no tabata tin niun deseo di pronto rekuperashon pa miembronan di frakshon di MPB, ku ta sufri di Covid-19, di parti di nan koleganan durante e reunion di komishon di Konseho Insular djaluna último.

Share This
error: Content is protected !!