KRALENDIJK—LVV último lunanan ta den ful swin pa loke ta trata produsimentu di entre otro fruta i bèrdura. Bou di guia di e konosido Maurice Adriaens, LVV ta progresando diariamente ku produkshon di bèrdura i frutanan di ranka, entre otro pampuna.  

Sekretario di Estado Raymond Knops tabata di bishita resientemente na LVV. El a keda impreshoná di loke el a tuma nota di dje na LVV situá na plantashi Aruba. El a bisa aparte di hasi su mes independiente pa loke ta importashon di alimento, e aktividat aki por generá entrada pa hendenan lokal. Pues Boneiru tin bon benefisio pronto ku e desaroyonan na LVV.   

TA POSIBEL PLANTA NA BONEIRU 

Hopi a pensa, investigá, papia, sinembargo Maurice Adriaens i su tim a hasié un realidat. Ku un palabra e ta posibel pa nos planta gran parti di fruta i bèrdura na Boneiru. Echo ta, solamente ku poko esfuerso e ta posibel. Sinta den ofisina i pone riba papel, nunka mas e ta bira realidat. Plantamentu ta tuma lugá den tera. Último lunanan áwaseru a kai hopi. Sigur e ta yuda. Esei ta bèrdat, sinembargo promé ku áwaseru a kuminsá kai, ya tabatin bèrdura na LVV. E storia ku áwaseru no ta kai na Boneiru i no por planta, Maurice Adriaens, a duna prueba ku resultado, demostrando ku por planta na Boneiru. Esei ta e realidat. Awor ta momentu pa nos siña for d dje. Esaki ta loke algun persona a remarká di e bon trabou ku Maurice Adriaens ta hasiendo. Pa mas informashon i pa kumpra fruta i bèrdura por pasa na LVV na Kaminda di Lagun #32 òf yama 717-8836. Por bishitá tambe nan página di facebook ‘LVV Boneiru’ pa mas informashon di diferente kos ku ta sosodé na LVV.

Share This
error: Content is protected !!