KRALENDIJK – Djarason 13 di yanüari 2021, un biaha mas Kuerpo Polisial Hulanda Karibense (KPCN) den koperashon ku e departamentu di Supervishon i Mantenshon di Entidat Públiko ‘Toezicht en Handhaving’ a realisá un kòntròl multidisiplinario den oranan di anochi. A kontrolá riba por ehèmpel kumplimentu ku e distansia sosial i e kantidat máksimo di persona ku ta pèrmití. Tambe a wak si kada un establesementu tabata tin un papel di informashon ku klientenan mester skibi nan nòmber, adrès i number di telefon na momentu ku nan bishitá e establesementu. Esaki ta pa si dado kaso surgi un kontagio di e vírùs di corona na e sitio, departamentu di salubridat públiko por wak ken tur tabata tei riba kua fecha. Na kada kaso lo wak ta di ki tipo di violashon(nan) ta trata di dje i kua lo ta e mihó manera pa atendé ku esaki, hasiendo esaki ku rèspèt mutuo.

Pues e kòntròl tabata dirigí riba kumplimentu ku e ordenansa di emergensia vigente. A kontrolá un total di 14 establesimentu , di kua tur tabata kumpli ku e reglanan vigente. Den algun kaso e tim a duna instrukshon pa asina e sitionan por ta aun mas ‘safe’. E tim a pasa na tantu snèk, restorant i hotèl.

E kòntròl intensivo dor di e instansianan menshoná lo sigui tuma lugá regularmente den e periodo benidero. Un biaha mas ta sigui un yamada na un i tur pa tene nan mes na e reglanan di e ordenansa di emergensia.

Share This
error: Content is protected !!