KRALENDIJK – E trabou pa kita retraso serka e hóbennan di e unidat di SGB, Liseo Boneriano ta kana den bon direkshon. For di òktober 2020 a inisiá ku lèsnan èkstra, pa kombatí e retraso. Djarason 13 di yanüari a kuminsá ku entrega di kuminda pa e hóbennan, asina hasi e situashon mas kómodo na nan bienestar.

Ernest Comenensia, kende ta Kordinadó di e proyekto ‘Kombatishon di retraso’ na Liseo Boneriano a bisa ku e proyekto tin un durashon di 1 aña, ku e meta pa eliminá e retraso. For di awor nan ta haña kuminda tra’i mèrdia. E hóbennan ta bini skol for di mainta i ta keda skol te 5:30 atardi. Hulanda a duna oportunidat i nos a probechá di esaki pa drecha e situashon. Aparte di e tres siman ku skol tabata será debí na e problema di CoViD-19, ta yuda e hóbennan kende tambe tin sierto vak ku no ta stabil. Nan tin oportunidat pa drecha loke nan no ta bon den dje. Tin bon koperashon di mayor i e hóbennan pa tuma parti na e lèsnan èkstra. 16 dosente di liseo ta partisipá na e proyekto ‘Kombatishon di retraso’. 8 dosente ta simplemente tuma parti na e lèsnan èkstra, kende no ta di Liseo Boneriano. Pues 24 dosente ta forma parti di e proyekto menshoná. 215 hóben ta aktivo ku e lèsnan èkstra.

Interesante ta ku e direktor di unidat Liseo Boneriano Barbara Sol, tambe a hinka su skouder tras i e proyekto i e mes ta para den klas duna lès. Pues di ámbos partido e motivashon pa mehorashon tei. Potrèt ta ilustrá e hóbennan na skol.  

Share This
error: Content is protected !!