KRALENDIJK – Un suidadano a bai hasi tèst di CoViD-19 i nan a bis’é despues di algun dia ku su nòmber ta di vink riba papel, loke ta indiká ku nan a papia kuné. Radio Live 99.9 FM a papia ku e persona kende a splika kiko a sosodé. “Mi a yama pa hasi tèst di CoViD-19 i esaki a tuma lugá djabièrnè 8 di yanüari. Nan a bisa denter di 2 pa 3 dia mi ta tende kontesta. Nan a yama un dia despues ku ta djasabra pa dunami kontesta. Nan no a hañami na telefon. Bèrdat mi no tabata alkansabel pa kontesta nan yamada, sinembargo despues mi mes a yama bèk sin nan kontesta e telefon.

Mi a yama 0800 0800 djadumingu, djaluna, djamars i nan a bisa kisas e kosnan a bai, pero nan no a risibí e informashon for di Kòrsou. Pa medio di dòkter di kas ku tambe mi a yama wak si nan a tende algu dimi, nan a bisami ku e tèst a sali negativo. Nan a bisami, esta e dòkter di kas, ku e departamentu ku ta atendé ku tèstmentu, a menshoná ku nan a papia kumi i a bisami ku e tèst ta negativo. E kos no ta bon. E kos aki a pone ku mi a keda 7 dia na kas, sin bai traha sperando un kontesta. Djarason nan ta bisa tur kos ta bon kumi. Algu asina no mester pasa. Mester buska tur manera pa papia ku e persona pa inform’é. Mi tabata na kas sin bai niun kaminda sperando un kontesta, miéntras nan tabata sa i no a informámi”, e suidadano a bisa. 

Share This
error: Content is protected !!