AMSTERDAM – Gabinete Rutte lll a kai den kareda di 2:30 (ora di Hulanda). E promé minister di Hulanda Mark Rutte ta rumbo pa bai pidi Rei Willem Alexander retiru di su gabinete. Segun prensa Hulandes esaki a bai den bon esfera. Ya pa un temporada e menasa tabat’ei i tabata tin reunionnan maratóniko den e koalishon di VVD, CDA, D66 i ChristenUnie pero awe kosnan a pega kompletu. Awor ta nèt 2 luna promé ku elekshon di Tweede Kamer na luna di mart. E motibu aktual di e kaida di gabinete Rutte lll, ta relashoná ku un rapòrt ku tin tokante di ‘kinderopvangtoeslaag’ ku gabinete tabata debatí tokante di dje for di aña pasá. Míles di mayor na un manera inhustu mester a paga bèk sumanan kuantioso i a hañanan den problema finansiero. Ta papia di masomenos 26.000 mayor. E ministernan i sekretario di estado lo bai sigui funshoná pero di forma demishonario na bienestar di komunidat. Mas aki ratu tin mas informashon durante un rueda di prensa ku promé minister Mark Rutte lo tene relashoná ku e situashon.

Share This
error: Content is protected !!