KRALENDIJK – Awe mainta algun miembro di NAPB a presentá na ofisina prinsipal di gobièrnu pa papia ku gezaghèber riba un punto hopi preokupante. E miembronan no ta kontentu ku e palabrashon ku tin kaminda miembronan di kuerpo polisial por tèst despues di 6 dia ku nan ta den karentena, i si nan tèst ta negativo, nan por bai traha siguiente dia. Esaki no ta bon, mirando ku un hende por ta mustra bon, sinembargo despues di algun dia e por tin síntoma i si resultá e tin e vírùs i e ta pegando otronan. Apesar ku polisnan ta mantené nan mes na e reglanan di entre otro tapaboka, e situashon ta keda fastioso pa nan durante nan trabou. Awor ta ku polis i kisas un bes aki e ta amplia bai pa duana i otronan. Esaki tabata palabranan di presidente di sindikato NAPB BES, David Molina, esun ku a papia ku prensa awe mainta.

“P’esei nos ke atendé esaki awor. Nos a kaba papia ku gezaghèber Edison Rijna i awor nos ta sigui pa ofisina di KPCN i aya ta bai papia ku e hefe di kuerpo pa presenté algun idea ku nos tin. Tur hende sa kiko e vírùs a hasi último tempu. Mester tin un plan di emergensia ku ta funshoná pa yuda den e kuerpo na momentu ku un departamentu ta rekerí asistensia. Si e kòmbersashonnan no duna resultado nos lo bai mas leu ku esaki. Nos tin e impreshon despues di e kombersashon ku gezaghèber, kos ta bai den bon direkshon. Gezaghèber Edison Rijna a bisa nos ku e ta kompartí nos pensamentu i e ta responsabel pa e òrden públiko i ta bai atendé e asuntu. Tin polis aktualmente den karentena i ta trahando huntu ku koleganan sin ku 14 dia a pasa. Na Boneiru no tin un plan, kontrali na loke ta e kaso na Hulanda. Pa e motibu aki nos ta papiando pa yega na un struktura mihó”, David Molina a bisa.  

Share This
error: Content is protected !!