KRALENDIJK – Awe djabièrnè mainta miembronan di sindikato NAPB BES ku a keda skohé algun siman pasá den un elekshon pa un direktiva nobo, a presentá na ofisina di prinsipal di gobièrnu di Boneiru (BC) pa un situashon ku miembronan di Kuerpo Polisial Hulanda Karibense (KPCN) no ta di akuerdo kuné. Ta trata di un situashon kaminda Departamentu di Salubridat Públiko a manda informá ku; si un miembro di kuerpo polisial tèst positivo pa Coronavírùs, su otro koleganan ku tabata serka di dje mesora mester drenta karentena. Despues di 6 dia nan mester bai pasa un tèst i si e otro koleganan tèst negativo, despues di 6 dia e mester regresá trabou. Esaki no ta korekto. Pasobra e regla ta, un persona ku ta den karentena mester keda pa 10 dia i no 6. Kon por ta posibel ku un polis si por keda solamente 6 dia den karentena?

Ademas e informashon ta bisa ku despues di 6 dia, e polis mester bini trabou i despues di su 8 oranan di trabou e mester regresá kas i no por ta riba kaya te despues ku su 10 dianan ofisial di karentena pasa. Kon esaki por ta posibel si e agente su trabou ta di atendé ku hende riba kaya, patruyá riba kaya i despues di trabou mester bai kas i no por sali?

Awe mainta 4 miembro di direktiva a presentá na ofisina prinsipal di gobièrnu sperando yegada di gezaghèber Edison Rijna, pa nan papia kuné. Momentu ku el a presentá i a baha for di su outo, e grupo a papia kuné pero gezaghèber a bisa ku e tin otro kompromiso i no por papia na e momentu ei. A yega na e palabrashon pa awe poko mas lat nan sinta na mesa pa papia riba e tópiko ku ya nan a splika gezaghèber di dje.

Riba potrèt, algun momentu pasá, ora e presidente nobo di NAPB BES David Molina a topa ku gezaghèber Rijna den presensia di algun otro miembro di sindikato.

Share This
error: Content is protected !!