KRALENDIJK – E kompania di kontratista Turbo Tech B.V. a entregá un karta na tur trahadó i a pone nan na altura ku entrante 1 di yanüari 2021, nan no mester presentá na trabou. Ta papia di alrededor di 45 trahadó ku a wòrdu mandá kas. E kompania ariba menshoná a deklará su mes bankarota. Por komprondé di trahadónan ku no ta promé bia e doño di trabou ta aktua asina. Den pasado e tabatin hopi problema ku departamentu di belasting i a yega asina leu ku tabatin detenshon. Ta di tres bia ku ta deklará e kompania bankarota pa motibu di belasting.  

Algun tempu pasá a sera e kompania C.T Marchena N.V. i a pasa tur trahadó pa e kompania Turbo Tech. A primintí e trahadónan ku nan lo no pèrdè nada ku nan tabatin relashoná ku e temporada ku nan a traha na C.T Marchena. Esaki solamente a keda na palabra i nada di bèrdat, apesar ku a pone tur informashon riba papel. 

Trahadónan ta hopi mal kontentu e forma ku ta trata nan. A primintí nan sèn di aña nan ku nan a traha pa e kompania anterior i no a paga esaki. Tampoko no a informá nan adelantá ku kos no ta bai bon ku e kompania. Di sorpresa nan a tende awor ku e kompania a sera. Un kos ku ta straño serka trahadónan; durante e temporada di CoViD-19 e úniko sektor ku a kontinuá i a krese ta trabounan di konstrukshon. Kiko a bai robes ku Turbo Tech?  

Ta menshoná tambe ku e doño di trabou a sera e kompania i a habri un otro kompania i bai ku algun trahadó. Resientemente na Radio Live 99.9 FM, por a tende Cherel Kwidama, kende ta presidente di sindikato AFBW, i el a bisa ku doño nan di kompania ta deklará bankarota, sinembargo e kos no ta bai asina. Tin un proseso ku mester kana promé ku deklará bankarota.  

Share This
error: Content is protected !!