KRALENDIJK – Awe djaluna atardi ku e koloso di KLM a yega Boneiru dos detenido for di Hulanda. Riba petishon di Kòrsou a transportá e dos detenidonan aki pa Boneiru pa nan keda será den prizòn ‘JICN’ bou di vigilansia estrikto di Arestatie Team di Kòrsou.

Tur dos detenido ta testigu den e kaso ku ta andando kontra Jorge Jamalodin. Pa nan propio seguridat, nan ta keda den JICN aki na Boneiru i lo wòrdu transportá separá ku hèlikopter pa Kòrsou pa testiguá.

Ora nan kaba na Kòrsou, ta bolbe trese nan Boneiru i despues lo manda nan bèk pa Hulanda.
Ta trata di Givenchi Maria i Burney (Nini) Fonseca.
Nini ya a keda sentensiá den e kaso di asesinato Helmin Wiels na 26 aña di prizòn i ta sintando su kastigu na Hulanda.

Givenchi Maria ta sintando kastigu di prizòn relashoná ku un otro kaso di likidashon, pero ta testigu den kaso di Jamalodin.

Awe tabata e promé dia di tratamentu di e kaso di Jorge Jamalodin den apelashon.

FUENTE:AIMED AYUBI.

NOTISIA KU BO POR KONFIA.

Share This
error: Content is protected !!