KRALENDIJK – Djabièrnè 15 yanüari 2021 Monica Clarinda di ‘Fundashon Lesa Ta Dushi’ i Fleurtje Veldkamp di ‘Yuma Coaching’ a bishitá Sentro Hubentut i Famia. Nan a entregá algun buki pa muchanan ‘Para Liber’. Esaki den kuadro di un proyekto ku Sentro Hubentut i Famia(Shif) ta bai duna guia na muchanan ku tin un mayor òf ser kerí ku ta detené den prisòn.

Ta trata di un buki di ehersisio pa mucha di entre 6 pa 12 aña na Papiamentu. E buki Para Liber su enfoke ta riba ekspreshon di sintimentu i a wòrdu skirbi dor di “kindercoach” Conny van Tatenhove i tradusí na Papiamentu i Spañó. For di 2019 ya ta usando e buki aki na Kòrsou ku mucha nan den situashon nan similar i awor den 2021 lo ta bai kuminsá duna guia pa medio di e buki aki na e muchanan ku tin nesesidat pa ku esaki na Boneiru. Ta importante pa kibra e tabú i duna oido na mucha nan ku ta den e situashon aki.

E intenshon ta pa Sentro Hubentut i Famia (SHIF) via di treinen prepará trahadónan pedagógiko, pa por duna e guia pa medio di e bukinan na e grupo di enfoke. Fleurtje Veldkamp di ‘Yuma Coaching’ ta esun ku ta enkargá ku treinen.  

Direktor di SHIF Chris Palm a bisa, ku ta algu nobo pa muchanan ku nan mayor ta será den prison. “Hopi tempu tabata mester di esaki. E proyekto ta unu hopi importante.”

Monica Clarinda a bisa hopi bia ta lubidá e muchanan ku tin un ser kerí den prison. “Mucha di 6 pa 14 aña, nan ta tristu, rabiá i ta trese nan den un situashon fastioso. Nos di lesa ta dushi ta haña esaki importante. E ta stimulá muchanan pa lesa. Nos gusta duna un man pa e muchanan, pa mayan nan tin bon futuro. Awor ta entrega 5 buki.”

Fleurtje Veldkamp a bisa e buki ta algu hopi tempu tabata nesesario. “2 aña pasa a tradusí e buki na papiamentu. Na Kòrsou ya nan ta us’é. Ta un buki pa yuda e muchanan pa nan ta stabil i kontinuá apesar di e situashon ku nan ta den. Si ta bon otro luna ta kuminsá usa e buki. Esnan ku ta den situashon di nesesidat, por tuma kontakto ku SHIF. E buki tin di aber ku bida real. No solamente e detenido, sino e mayornan tambe ta haña guia”, Fleurtje Veldkamp a bisa. E proyekto yama ‘Para Liber’.  

Share This
error: Content is protected !!