Kralendijk,- Djasabra último den un esfera privá i chikitu na Courtyard by Marriott Resort, Storyline Production a presentá e kandidatanan pa Miss Tourism Bonaire 2021 “e embahadora di Boneiru”.

Tourism Corporation Bonaire pa dos aña a organisá e evento di Miss Tourism Bonaire i awor a enkargá Storyline Production pa organisá e sertámen aki. Storyline Production ta un organisashon ku ta konsistí di vários profeshonal ku tin eksperensha riba e área di turismo i tambe organisá evento. Nan a pone kabes huntu pa sigui brinda Boneiru un embahadora di Turismo tur aña.

E programa di djasabra último a kuminsá ku palabranan di representante di Storyline Production, Segni Bernadina. El a splika ku for di aña pasá ougùstùs mester a tuma lugá e di tres edishon di Miss Tourism Bonaire. Debí na e situashon di Covid-19 a kanselá e sertámen i a opta pa wak kon e situashon di Covid-19 ta desaroyá i pensa otro forma ku lo por organisá e sertámen.

E desishon a kai ku ta bai hasi esaki den 2021 i lo e bai ta den un forma virtual kaminda ku tur hende lo por sigui e desaroyo i tambe e sertámen pa via di medionan sosial i prensa en general.

Seguidamente Sr. Angelo Domacasse ku ta e kordinadó di e sertámen a konta di e programa i e plannan ku ta sigui. Na promé lugá e kandidatanan lo haña yudansa den nan desaroyo personal i profeshonal. Meta tras di Miss Turismo Boneiru ta pa e ganadora por pasa su reinado plasentero, ta e kara di Boneiru, representá i promoshoná Boneiru ariba tur tereno; medionan sosial, filmashon i sekshon di potrètnan tantu nashonal i internashonal. E embahadoranan lo bai bin ku ideanan nobo kon pa Boneiru por sigui krese den turismo den e normal nobo.

Seguidamente Rayshantaly Coffie a hiba palabra i a konta di su eksperensha durante di e aña tras di lomba. E la deseá e partisipantenan tur klase di éksito i alabes el a bisa ku nan por konta ku su sosten durante di e temporada di preparashon.

Finalmente Diputado Hennyson Thielman a hiba palabra i a gradisí e 4 kandidatanan ku a pone nan mes disponibel pa ta embahadornan di Boneiru. Diputado a pone mesora na nan atenshon ku enbèrdat e temporada ta difísil pero ta konta ku nan kreatividat pa bin ku ideanan i duna un man pa por trese turistanan bek Boneiru. Pero tambe nan tin e tarea pa ban konsientisá nos pueblo di e importansia di turismo ku ta e ader di nos ekonomia. Diputado Hennyson Thielman a deseá e kandidatanan éksito i ku e temporada lo sirbi pa nan siña hopi i logra hopi.

Despues di e diferente spichnan a sigui e numerashon di e kandidatanan. Kada kandidata a haña un saku di regalo i den esaki tabata tin un number. E number ofisial di e kandidata pa e temporada di e sertámen. Diputado Hennyson Thielman i Miss Turismo Rayshantaly Coffie tabata esnan ku a bisti e kandidatanan nan shèrp ofisial di Miss Tourism Bonaire. Asina a kulminá e anochi di presentashon ofisial di e 4 kandidatanan pa Miss Tourism Bonaire 2021.

E partisipantenan pa Miss Tourism Bonaire 2021 ta:

1. Henmavienne De Palm

2. Jedeany Schoop

3. Sunniva Manuel

4. Marjely Doran

Storyline Productions kier a yama un danki di kurason pa e konfiansa na tur e 4 kandidatanan i e mayornan ku a kere den e sertámen i ta garantisá ku nan lo bai sòru pa duna un produkto riba nivel haltu. Nos ke invitá pueblo di Boneiru kompletu pa sigui nos facebook page Miss Tourism Bonaire i Storyline Production, paso nan lo ta kargá ku aktividat i informashon.

Share This
error: Content is protected !!