KRALENDIJK – Suidadano Arthur Sealy ta papia tokante konferersia di prensa di resientemente. “Durante e konferensia di prensa di gobièrnu riba 15 di yanüari 2021 dos profeshonal, riba esaki no tin duda, a bin duna informashon tokante bakunashon. No tabatin un introdukshon tokante un plan, un strategia, un kampaña di informashon. A laga prensa hasi pregunta loke a resultá den un káos total. No por a hasi pregunta dirigí riba un maneho ku no tin, sinembargo miembronan di prensa a purba. E tipo di duna informashon aki ta hasi trabou di prensa, ku a base di e informashonnan por yuda trese diskushon, trankilidat den pueblo, demasiado difísil.

Kontestanan tabata vago sin ningun struktura. A resultá ku no sa kuantu bakuna mester pa e grupo di sesenta aña bai ariba. Na Registro sivil ta fásil haña sa e kantidat i serka e dòkternan di kas por haña informashon di personanan ku diferente tipo di malesa. No a bini dilanti ku tin komunikashon ku e instansianan aki. Ainda e plan di komunikashon/informashon no tei. Ainda no tin un lokalidat pa warda e bakuna. E vrizernan no ta na Bonaire, kisas fin di luna, sinembargo ta kuminsá bakuná den luna di febrüari, No ta obligatorio pa tuma e bakuna, pero no a hasi ningun enkuesta pa sa kuantu hende ta pará negativo kontra e bakuna.

Preguntanan manera: si un persona tuma e bakuna i muri a konsekuensia di e bakuna kiko ta bai pasa. E kontesta tabata; Tin protokòl. Kua protokòl? Kua ta e posibel efektonan di e bakuna. Kontesta; un doló na e parti unda a pasa e angua, un tiki doló di kabes, keintura, pero no ta mustra riba e duda ku hende tin a base di informashonnan, tantu fiktisio komo bèrdat, ku no ta di e kanal ofisial di Bonaire. Kon ta bai konvensé hende pa tuma e bakuna. Ki riesgo tin pa muhé na estado, hende di edat avansá, hende ku malesa króniko. Awor ta momentu pa Konseho Insular kuestioná Kolegio Ehekutivo i bini ku proposishon pa regla e asuntu di informashon na un manera drechi. Kolegio Ehekutivo mester duna di konosé ku si tin un grupo di proyekto instituí pa diputado di salubridat. Ken ta e miembronan, kon e plan di duna informashon ta, kua ruta ta sigui pa bakuná e pueblo. No por laga e pueblo den duda. Pa loke ta trata informashon un súplika: Por fabor laga V&P leu for di asuntu aki”, Arthur Sealy a bisa.  

Share This
error: Content is protected !!