Kralendijk – “Awe e loke mi tin di bisa ta relativamente kòrtiku. Siman pasá a kambia e lei temporal di COVID-19 na Hulanda i esaki ta nifiká entre otro ku e prohibishon di buelo ku tabata konta pa islanan BES, no ta na vigor mas. Ta p’esei ta pèrmití atrobe buelonan di Canada i Merka pa Boneiru”, gezaghèber Edison Rijna a bisa fin di siman pasá durante un enkuentro ku prensa. “Kompanianan di aviashon mester tene nan mes na e lei nobo ora ta trata kontròl di tèst di PCR. Den práktika semper ta dura un tempu promé ku tráfiko aéreo ta manera kustumber. Pues lo dura algun siman promé ku e promé buelonan di e paisnan menshoná yega i sali for di Boneiru. 

Siman pasá tambe mi a anunsiá ku direktorado di Supervishon i Mantenshon di Lei konhuntamente ku kuerpo polisial Karibe Hulandes, lo aktua severamente si empresarionan den hóreka no tene nan mes na regla. Mi a bisa ku e tempu di atvertí tambe a pasa. Djamars último inspektornan di Supervishon i Mantenshon den koperashon estrecho ku KPCN a but i sera shete establesimentu di hóreka. Na tur e anochi ei a kontrolá 16 establesimentu di hóreka. Ayera, djaweps tambe a hasi kontròl. Durante e kontròlnan ei sí no a parti but komo ku tur hende a tene nan mes e reglanan manera eseinan ta stipulá. 

E medidanan ku mi a anunsiá siman pasá ta keda na vigor. Mi ta konta ku tur hende ta tene nan mes na e reglanan. Huntu nos por kontrolá e vírùs di corona si tur hende aportá ku nan granito”, gezaghèber Edison Rijna a bisa.

Share This
error: Content is protected !!