KRALENDIJK – D’Shantee Soliana, un hóben ku ta bishitá e skol di baile ‘Dance Sensation’ na Kas di Talento situá na Kaya Italia number 9, a haña un ròl importante den un pelíkula ku lo bai wòrdu filmá aki na Boneiru. Dosente di baile Joella Ramos a skohe D’Shantee Soliana ku ta un di su alumnonan pa forma parti di un oudishon pa hunga ròl di un hóben di 11 aña yama ‘Millie’. Yùfrou Joella, ta tambe e guia di D’Shantee, durante grabashonnan ku ta bai tuma lugá. 

E skol di baile ke yama danki na e tim di produkshon di Caribbeanfilm.com, ku ta e mesun grupo ku a produsí e pelíkula ‘Bulado’, ku ta nominá pa ‘Het gouden kalf film’ na Hulanda. E tabata e mihó pelíkula di 2020, ku tabata grabá na Kòrsou. Aktualmente por mira e pelíkula di ‘Bulado’ na Empire Cinema.

E tim formá pa e produktor Michel Drenthe, ‘Casting Director’ Vanessa Werkhoven i e direktor Bob Wilbers, na fin di e oudishon a hasi nan eskoho pa D’Shantee Soliana. Famia Paula, Winklaar i Soliana ta hopi orguyoso i kontentu ku e oportunidat. Durante di e periodo ku ta bini, por nota grabashonnan ku ta tuma lugá aki aya riba nos isla pa e pelíkula ku ta bini titulá ‘Casa Coco’. D’Shantee ta e akris hóben di 11 aña ku yama ‘Millie’. D’Shantee, ta un hóben di 11 aña ku ta bishitá Kolegio San Bernardo den grupo 8. For di edat di 4 aña e ta bai skol di baile Dance Sensation. Resientemente D’Shantee, a forma parti di un proyekto komo bailarina den un ‘video clip’ grabá ku nos tan famoso artista Boneriano Ir-Sais. E skol di baile ta orguyoso ku Boneiru tin hóbennan talentoso i apesar di e pandemia di CoViD-19, nan ta risibí oportunidat di oro.

Share This
error: Content is protected !!