KRALENDIJK – Resientemente Federashon di Futbòl Boneriano (FFB) bou di presidensia di sr. Ludwig “Luti”Balentin, tabatin un enkuentro ku prensa i otro invitadonan na Stadion Antonio Trenidad na Rincon.

Durante e enkuentro aki a inougurá 3 kamerin di kua unu pa rèfrinan i dos pa e timnan, den Stadion na Rincon.
Aparte di esaki, a bendishoná tambe un “bùs” ku FFB lo bai hasi uso di dje por ehèmpel durante ku tin ku buska hungadónan di selekshon fo’i Rincon pa trein na Playa.

Diputado di deporte sr. James Kroon a inougurá e kamerinnan kòrtando sinta, tambe e mandatario a bendishoná e “bùs” di FFB. E bùs lo tin diferente otro uso mas momentu ku mester di esaki.

E enkuentro di e atardi aki a inisiá ku palabranan di sra. Jehan Pourier-Martis di ofisina di FFB ku a kordiná e enkuentro aki ku prensa i otro invitadonan, hasiendo un tremendo trabou. Na e okashon aki a hiba palabra e presidente di FFB,sr. Ludwig “Luti” Balentin ku a duna splikashon kon a logra yega na e kamerinnan, tambe e bùs i otro materialnan ku FFB a logra pa nos futbòl. Por a komprondé durante sr. Balentin du diskurso, ku esakinan ta un parti, ta awó esakinan a kuminsá yega Boneiru, pero tin mas na kaminda ku tin ku yega Boneiru pa ku nos futbòl. Tin desaroyonan tumando lugá den futbòl i por spera muchu mas desaroyonan den futbòl di nos isla, esaki pa adelanto di e Deporte Rei Futbòl.

Trabounan ta tumando lugá, hopi trabou pa hasi, pero “trabou duru ta paga”. Ta esaki ta pasando na e momentunan aki ku Boneiru i ku nos futbòl den su desaroyo, ya ku kada momentu ku logra haña un oportunidat pa lòbi pa nos sigui logra mas pa nos futbòl, ta hasi esaki ku éksito logrando entre otro e bùs i kamerinnan ku a kaba inougurá i bendishoná.

Nos ta deseá FFB hopi éksito i sigui ku e bon trabou pa sigui logra mas pa nos futbòl i nos isla. Riba potrètnan por mira momentu ku a inougurá e kamerinnan, tambe bendishoná e bùs pa FFB.

Share This
error: Content is protected !!