KRALENDIJK – Kastigu di prison di 8 i 5 aña pa tres akusado enbolbí den kaso di atrako na ‘Divi Flamingo Casino’. Esaki ta loke fiskal Teengs Gerritsen a demandá komo kastigu pa esnan enbolbí den e atrako, ku a tuma lugá na e kasino, riba tereno di hotèl Divi Flamingo. E abogado apesar ku a trese un komentashon amplio di e kaso dilanti; e no ta mira prueba sólido. Siman pasá korte den promé Instansia a atendé e kaso den su kontenido. Segun ekspertonan, Gedion M. Tin difikultat pa rekonosé sentimentu di otronan. Su inteligensia ta bou di promedio, loke ta hasi e situashon poko fastioso i no por pon’é kompletamente responsabel pa su aktonan. Tokante Charlon S., ekspertonan a bisa ku e si ta pensa i kalkulá hopi bon promé ku e aktua. E ta pensa hopi fásil tokante krímen ku ta konserní sèn. Fiskal Teengs Geritsen a menshoná ku tabata di un atrako sumamente serio i violento. Atrakadónan a basha bala riba e bewakernan i di un forma milagroso, nan a skapa di no a pèrdè nan bida. Ta trata di un atrako, kaminda 4 hende tabata enbolbí. Siki C. Kende ta detené na Kòrsou, i e trio presente den sala di korte Henk W. Welvaart. Remarkabel tabata durante e rekisitorio, a apsolbé Charlon S. di e akusashon di ta kómplise pa e atrako. Sí a akus’é di a yuda kometé e atrako. Ministerio Públiko a demanda un kastigu di prison di 8 aña pa Gedion M. i Charlesson S.. Pa Charlon S., el a demanda un kastigu di prison di 5 aña i pa sinta un kastigu anterior di 37 dia. Tambe Ministerio Públiko a pidi pa entrega e 20.000 dòler konfiská na ‘Divi Flamingo Casino’. Abogado mr. Osepa práktikamente a bisa den su defensa di e akusado; ku ta otro hòmber a kometé e atrako. Su kliente no por papia den presensia di hopi hende; pasobra e sa e konsekuensianan. Abogado mr. Winkel tambe a boga libertat di su kliente. El a bisa ku e no a tende nada konkreto awe. A wak e grabashonnan i no por a rekonosé su kliente. Abogado Marga van Lieshout a bisa ku práktikamente no ta menshoná nòmber di su kliente i no tin prueba ku el a duna informashon, a base di ‘inside job’. “No ta keda korte nada pa apsolbé Charlon S. di tur akusashon”, abogado van Lieshout a bisa. 4 di febrüari 2021 korte di Promé Instansia ta dikta sentensia di Gedion S. i Charlon S.. 

Share This
error: Content is protected !!