KRALENDIJK – Pronto lo kuminsá ku trabounan pa Fèlt ATC na Tera Kòrá haña yerba artifisial i despues na Fèlt Rudy Boezem na Nort Saliña Pabou.

Esaki diputado di deporte, sr. James Kroon, a duna di konosé den entrevista ku boso sirbidor Ibi Piar di e programa aki di deporte.

Si ta bon asina promé ku luna di yanüari kaba, lo kuminsá ku e trabounan pa prepará e fundeshi etc pa e yerba artifisial.

Tur kos ta kla, tur kos ta reglá kaba segun e mandatario a duna di konosé.

Ku esaki a mandatario ke bisa ku tur loke tabatin ku regla pa esaki, ta reglá tambe kaba, loke ta nifiká ku nada lo por stroba esaki di bini, nada lo stroba e trabounan di kuminsá ku no ta solamente áwaseru. Tur loke otro ku mester a regla pa esaki, ta reglá kaba pues.

Asina ku finalisá ku e trabounan di yerba artifisial na riba Fèlt ATC i na satisfakshon, lo kuminsá ku e trabounan pa yerba bini tambe na Fèlt Rudy Boezem.

Basta dia esakinan tabata den tapara, porfin ta asina leu ku e trabounan ta kla pa kuminsá pa e fèltnan aki haña yerba. Ku esaki dos fèlt di futbòl mas tei haña yerba e aña aki riba nos isla.

Na e fèlt na entrada di Rincon tambe, fèlt konosí komo Fèlt Pariba, akinan tambe lo haña yerba pero unu mas bien pa trein ariba.

Tin mas proyektonan na kaminda, di kua e aña aki lo bira e aña di Boneiru pa loke ta su deporte.

No solamente den e deporte di futbòl pero tambe den otro deportenan tambe tin moveshonnan positivo tei kuminsá e aña aki.

Un di nan ta tambe e deporte di vòlibòl di sala di vòlibòl di “beach” ku tambe lo bai haña ayudonan di Hulanda i asina por sigui menshoná mas.

Ku otro palabra, e aña aki ta aña di desaroyonan positivo pa deporte di Boneiru.

Share This
error: Content is protected !!