KRALENDIJK – Kaya Nikiboko Sùit entre parokia San Bernardo pa rotònde Nikiboko na altura di supermerkado van Den Tweel, ta notabel hopi tera riba e kaminda. Último tempu tabatin hopi yobida i esaki por ta motibu ku tin hopi mas tera ku vehíkulonan ta karga trese riba kaminda ku a bira na sierto parti seru di tera. Un siklista a aserká Radio Live99.9FM i ta bisa ku e kaminda a bira peligroso, den e sentido ku e kaya ta yená ku tera i ta pone ku baiskel nan no ta kore stabil. Tin paseo spesial traha pa kore baiskel (fietspad), sinembargo ta difísil pa manehá debí na e tera ku tin. Den pasado tabata mantené e kaya ku regularidat. Sinembargo awor ku e ta rekerí mas atenshon, no ta mira e mashin di Selibon N.V. ku den pasado tabata pasa riba e kaminda i barié. Si bo wanta brek, esaki por ponebo slep i kai. E siklista a konta kon outo a hera alkanse, debí ku e tera a pone kita poko fo’i e paseo di baiskel i hala riba e banda ku outo ta kore. Danki Dios e shofùr atento den su outo, a hala pa evitá un choke. E siklista ta spera ku instansianan konserní por hasi algu na e situashon pa evitá kualke situashon lamentabel.

Ta bon pa informá ku awe despues ku Radio Live 99.9 FM a pasa e informashon 7’or di mainta na radio tokante tera riba Kaya Nikiboko Sùit, trabou di barimentu a kuminsá pa hasi e kaya limpi, loke ta di aploudí.    

Share This
error: Content is protected !!