KRALENDIJK – Ansley Agostien a gana e outo di e kampaña 2020 di e kompania di ‘Cable’ i internèt aki na Boneiru ku ta ‘Flamingo TV’. Djaweps anochi e siudadano di Bario Nort’i Saliña a keda sorprendé ku un Kia Picanto 2021, 0 kilometer ku a bira di dje. Den presensia di notario Kenneth Arends i doño di Flamingo TV, Urwin Halley a saka tres kliente di Flamingo TV for di den tómbola. Giovanni Gijsbertha, mènedjer di e planta di televishon NosTV a saka e promé lòt for di tómbola i tabata Urbano Nicolaas ku a gana 1 aña di ‘Cable’ kompletamente grátis. Despues a toka turno na Rainer Valentijn ku a saka Roberto Medardo Salsbach komo ganado di e di 2 premio ku ta 1 aña di internèt grátis. E momentu sero a yega i tabata Patrick Dowling, direktor general di Flamingo TV ku tabata na turno pa hinka man den tómbola i saka e lòt ganadó di e premio grandi. El a bisa ku e ta usa man di kurason (man robes), pa saka e lòt ku nòmber di e ganadó di e outo. Ku hopi tenshon el a hinka man, saka e lòt i despues ku notario Arends i gerente di Flamingo TV a revisá tur kos, a anunsiá e nòmber ganadó ku a resultá di ta; Ansley Agostien. Remarkabel ta ku tur 3 persona ku a kai den premio, ta for di Bario Nort’i Saliña. Rainer Valentijn a bèl e ganadó i el a ekspresá su promé palabranan: ”Sí, mi a tende na radio ku mi a gana e outo. Mi kasa a gritami bisami ku mi nòmber a sali na radio. Promé ku esei, un besiña a kore drenta mi kurá di kas i bisami; pabien ku mi a gana. E momentu ei mi no tabata sa ku mi a gana i kiko e kos tabata”, ganadó di e outo a bisa. Poko despues Ansley Agostien a presentá na ofisina di Flamingo TV na Kaya Korona, pa tuma nota di e outo nobo ku el a gana. ”Un bia mi a yega te na e último 2 hende pa gana un outo (di Radio Live 99.9 FM), i mi no a logra, apesar ku mi tabatin hopi deseo. Awe si e dia a yega. E bia aki sin tabata na altura, mi a gan’é. E ta pa mi famia. Nan tabata yena papel p’ami tira den buzon. Mi ta hopi kontentu i mi ta gradisí Dios pa e regalo aki. Mi ta kliente di Flamingo TV for di 2006” 

Patrick Dowling, despues di a dirigí algun palabra di gradisimentu; a entrega e yabi di e outo na e ganadó. Esaki ta e di 6 outo ku ‘Flamingo TV’ ta regalá na un di su fiel klientenan. Tur kliente ta partisipá ku chèns pa gana e outo. ‘Flamingo TV’ e aña aki ta kumpli 35 aña di eksistensia i ta bai tin kosnan grandi pa tur kliente. Keda pendiente pa e kampaña 2021, ku ta bai ranka sali i tèrminá na luna di òktober ku un selebrashon grandi si e situashon aktual pèrmití. Di e forma aki ta yama danki na e pueblo di Boneiru, ku semper ta konta ku e bon servisio di ‘Flamingo TV’, ya pa 35 aña. 

Share This
error: Content is protected !!