KRALENDIJK – Durante tratamentu di kaso relashoná ku atrako na Divi Flamingo Casino, Elvis B., un di e bewakernan, a pidi un montante di 30.000 dòler komo daño di perhuisio. El a bisa ku su bida bal mas ku kualke montante di sèn. Un otro bewaker presente di inisial P., a entregá un petishon pa 10.000 dòler komo daño di perhuisio. Propietario di e kompania di seguridat SSS, Benito Dirksz, a entregá un petishon pa daño perhuisio di $7500. Esaki debí ku loke a sosodé a perhudiká su kompania. Aserka, el a pidi 86.000 dòler, pasobra kasino a hasi su kompania responsabel pa e montante ku e atrakadónan a bai kuné. Abogado di Divi Flamingo Casino, a bisa; tur hende kondená den e kaso ta responsabel pa e montante. Ta pone SSS responsabel debí ku tin un empleado di nan sospechoso den e kaso. Despues ku abogado mr. Winkel a menshoná diferente punto ku SSS no a kumpli kuné, entre otro no a usa e vehíkulo spesial pa transporte di sèn i no tin un seguro kontra e tipo di kosnan aki. Riba pregunta di hues, akusadonan a bisa ku nan no por paga pa algu ku nan no a hasi. Akusado Charlon S. a bisa hues Edelenbos durante tratamentu di kaso den korte, ku loke el a bisa polis no ta sufisiente i e ta hasi uso di su derechi di keda ketu. Esaki a sosodé djaweps 14 di yanüari durante tratamentu di e kaso di atrako riba Divi Flamingo Casino. Ministerio Públiko ta akusá rumannan Charlesson i Charlon S. i tambe Gedion M, di e akto kriminal. Abogado mr. Van Lieshout a representá Charlon S., miéntras abogado mr. Winkel a defendé Charlesson S.. E akusado Gedion M., ta kliente di abogado mr. Osepa. A tuma kasi 7 ora pa trata e kaso, sinembargo e trio no a papia mashá. Entre otro a papia kon e atrako a tuma lugá e anochi 10 di mart 2020. E atrakadónan a bai ku 86.000 mil dòler for di e kasino. Riba un informashon anónimo ku polis a risibí, nan a kuminsá e investigashon i a duna e kaso e nòmber KATA. Ministerio Públiko ta konvensí ku ta Charlesson S. i Gedion M., a kometé e akto violento. Tin un sospechoso mas, kende ta Siki C. i na e momentu aki e ta detené na Kòrsou pa otro kaso kastigabel. E trio durante tratamentu di kaso a keda menshoná, ku nan no ta metí den e kaso. Korte den Promé Instansia lo sentensiá e trio, 4 di febrüari awor. 

Share This
error: Content is protected !!