KRALENDIJK – Suidadano Ensly Emers ta hopi desgustá ku e servisio di ZVK, i ta bisa: ”ZVK no ta duna hende atenshon pa e funshon. E servisio ta laga hopi di deseá, no pa ami so, sinembargo hopi hende tin reklamo i tin miedu pa sali dilanti.  

“Mi a bai Aruba djaluna último pa dòkter i momentu ku mi a bai hotèl, nan a bisa mi ku nòmber no ta pone den reservashon, pues mi mester bai un otro lugá. Ora mi a bai e otro lugá (Comfort),  a resultá ku ta un sitio manera un asina yamá ‘Kui’. No ta un lugá konfortabel pa atendé ku hende enfermo. Atardi mi mester a bula bin Boneiru. A kambia buelo sin avisá nos. Ta e taksista a informá nos ku ZVK a kambia nos buelo. Djarason nos a yega Boneiru; bon pa algun boneriano ku ta bata den bisindario pa a informá nos, sino nos lo a pèrdè buelo. Mi a bai ZVK pa atendé mi papelnan pa mi bai Aruba pa operashon otro siman. ZVK a mandami pa mi spesialista, pasobra e mester atendé karta di garantia pa dòkternan na Aruba. E spesialista a bisami ta ZVK mester atendé e asuntu di karta di garantia. Esei a sosodé ayera djaweps. Awe mi a presentá na ZVK pa mi wak konta ku e desaroyo di mi kosnan, pasobra djaluna 25 di yanüari (otro siman), mi ta bula pa Kòrsou. Aya na ofisina di ZVK, nan a bisami kosnan ta kana, sinembargo  e asuntu di un ayudante pa bai huntu ku mi no ta poné riba papel. Mi a bisa e persona na bali; mi ta bai hasi operashon di lomba i mi no por bai mi so. Mester di un hende pa yudami. Nan a bisami ku dòkter mester a pone ku un ayudante mester bai kumi. Mi a splika nan ku tin un departamentu ku ta atendé e kosnan, dikon nan no ta mira e nesesidat den mi kaso pa un ayudante? Mi a sinta henter mainta na ofisina di ZVK, di strès pa tende kiko ta bai sosodé ku papelnan. Tur esaki riba e tenshon ku mi tin di mi operashon ku mi ta bai Aruba pa hasi. Aparte dimi, tin mas hende ta malkontentu kon ZVK ta atendé ku pashènt.  

Ta despues di 5 aña mi ta regresá ZVK. Mi a pasa e prosesonan pa wak kiko ta mi problema di salú i awor mi ta nota ku ZVK ta funshoná meskos ku tabata e kaso 5 aña pasa. ZVK no ta duna e atenshon nesesario. Nan ta hasi manera nan ta deseá. Nan no ta komuniká ku pashènt. Mandabo hotèl ku no ta adekuá pa hende malu, kambia buelo sin avisá i awor nan ke mandami Aruba sin un persona komo ayudante. Inkreibel ku ZVK”, Ensly Emers a bisa.

Riba potrèt Ensly Emers dilanti ofisina di ZVK awe mainta sperando informashon. 

Share This
error: Content is protected !!