KRALENDIJK – E hefe nobo di e departamentu Ruimte en Ontwikkeling Roy Martina, djasabra último a bisa ku a stòp tur trabou na e rotònde na altura di Kaya Amsterdam i Kaminda Djabou, debí na un situashon inkomprendibel. Esaki tabata kontesta riba pregunta ku Burney Elhage (di e programa radial ‘Desaroyo Live’ na Live99.9 FM) a hasi na Roy Martina. Resientemente Novile Bartholomeus i Martijn Zwiers di Boneriaanse Wegenbouw Maatschappij (BWM), esnan kende ta konstruyendo e rotònde menshoná, a bisa ku tur kos ta kanando den bon direkshon i pa fin di luna awor (aki 5 dia), e rotònde ta disponibel pa tur vehíkulo sin eksepshon! E diskushonnan ku tabata tin ku e rotònde a bira mas chikitu ta kuadra sinembargo e ta kumpli ku tur regla. Pues tantu baiskel, outo, trùknan pisá i treiler ku kònteiner di 40 pia por lora ariba. Ounke e pintura original riba mapa, no ta loke a wòrdu konstruí. A bini dilanti ku loke a pinta originalmente a sali muchu karu i a hasi algun ahustashon pa por a traha e rotònde poko mas chikitu, loke ta mas barata. Ta gobièrnu ta tuma desishon kon ta traha òf kua diseño nan ke, ”Novile Bartholomeus a bisa.

E hefe nobo di R&O a bisa djasabra último ku a stòp tur trabou debí ku no tin un bista kla tokante e situashon. ”Mi mes no sa kiko ta pasando. Ta investigando kiko a sosodé realmente na e rotònde aki. Personalmente mi no sa e motibu kiko a sosodé na e sitio. Huntu ku Kolegio Ehekutivo i e ‘stuurgroep’ di Hulanda, nos a yega na e palabrashon pa stòp e trabou na e rotònde. Awor ku a para e trabou, ta bai buska informashon di loke a sosodé na e rotònde tan komentá. No tin klaridat, pues no por tuma desishon. Mi no tin informashon kiko tabata e palabrashonnan, abase di kiko e rotònde a wòrdu diseñá, kiko ta e midínan etc. Mi no por bisa si e ta bon, ni malu. Mi ta pidi pueblo Boneriano untiki indulgensia. Si mi duna opinion awor mi ta kontaminá loke no ta korekto. Mi no ke mustra dede robes riba niun hende. Simplemente nos tambe ke sa kiko ta pasando pa asina solushoná e problema ku tin òf si no tin problema, pa wak den e trayekto di komunikashon kiko a bai robes i pa hasié mas mihó. Momentu ku nos sa kiko ta kiko, por papia di esaki i solushoná e problema. Pues momentu kumi tin informashon konkreto, gobièrnu lo publiká esaki”, Roy Martina a bisa djasabra último.

Share This
error: Content is protected !!