Kralendijk – Djaweps tras di lomba kandidatanan pa Miss Turismo 2021 a bishitá Diputado Den Heyer i Thielman na ofisina prinsipal di Gobièrnu. Durante di e atardi aki e kandidatanan a keda ofisialmente instalá. E instalashon ta un parti simbóliko kaminda diputado Nina den Heyer den e kaso aki, representando Gezaghebber, a pega e pen di Boneiru na e shèrp di kada kandidata. Asina tur e partisipantenan a keda instalá ofisialmente.

Diputado Den Heyer a bisa ku e ta para pa desaroyo di hende muhé. El a splika ku si na un pais e hende muhé ta bon i fuerte kosnan ta bai bon. Pa motibu ku hende muhé tin den dje e don di mama i un mama ta kuida i ta sòru pa kosnan kana. Esei ta parti di historia di Boneiru ku e hòmber semper a bai afó bai traha i e muhé a sòru pa kosnan a sigui kana.

Diputado ta spera ku komo kantidatnan pa Miss Turismo, nan lo ta ehèmpelnan pa mustra ku por i maske ku hende bisa bo, ku bo lo no logra, no laga esaki kibra bo. Esnan ku ta bisa no por mester hala un kantu pa esnan ku si ta kere ku por. Kada un di boso tin un potensial i un propósito, bai pe.

Seguidamente Diputado Thielman tambe a enfatisá ku e ta kere ku sigur sigur nos Kandidatanan lo bai duna un aporte na yuda pa surpasá e temporada difísil ku nos ta den pa loke ta trata turismo

Kada idea ta bon bini i p’esei e ròl di Miss Turismo ta importante. Diputado Thielman a pidi e kandidatanan pa ban yuda motivá e pueblo di Boneiru i konsientisánan di e benefisio di turismo pa nos pais.

Despues di e dos diskursonan di Diputado Den Heyer i Thielman a toka turno na e kandidatanan pa presentá nan ideanan pa ku desaroyo di turismo.

Kantidata nr. 1 Henmavienne de Palm a presentá un plan pa trese artistanan di arte di rònt mundu i tambe fashonistanan pa organisá aki na Boneiru un “convention” i tambe ekshibishon di arte i moda un biaha pa aña.

Kandidata nr.2 Jedeany Schoop a bin ku e idea pa un “Go green Tourism”. E ke motivá tur hende lokal pa ban kuida nos naturalesa i krea un konsepto di eco-tourism. Prinsipalmente kaminda e turista por keda den camping i eksplorá nos naturalesa.

Kantidata nr. 3 Sunniva Manuel kier hasi uso di nos espasio aéreo kombiná ku nos bunita paisahe nan pa bin ku mas atrakshon pa turismo hasiendo uso di aviashon. Por ehèmpel Skydiving i tambe Skytours. Esaki lo krea mas empleo den e sektor di aviashon. Pa logra esaki mester lanta un skol di aviashon aki na Boneiru. Sunniva a trese dilanti ku lo por organisá tambe un feria di aviashon ku ta atraé bastante afishonado di e mundu di aviashon.

Kantidata nr. 4 Marjely Doran ta pashoná ku e mundu di motorsport i e ta kere ku esaki sigur ta un sektor ku lo por atraé bastante turista pa Boneiru si por logra establesé un pista profeshonal pa drag i drift. Si Boneiru afiliá ku e organisashon internashonal di Drag esaki lo por te asta fasilitá fondo i tambe organisá kompetenshanan internashonal na Boneiru tresiendo míles di partisipante i fanátiko

Despues di e presentashon di e ideanan di kada kandidata Diputado Thielman i Diputado Den Heyer a gradisí e kandidatanan i a risibínan nan plannan ku hopi alegria. Seguidamente a instalanan ofisialmente ku e pin ku e eskudo di Boneiru i a deseá kada kandidata éksito den e trayekto di Miss Tourism Bonaire 2021.

Share This
error: Content is protected !!