KRALENDIJK – Diputado Nina den Heyer a menshoná ku awor loke mas tin prioridat, ta e parti di bakunashon na Boneiru. “Ta den ful preparashon kon ta bai atendé ku bakunamentu. Ta un tópiko di e periodo. Nos ta mira islanan ruman ta komuniká di dje, miéntras Boneiru no ta papia mashá di esaki. Lagami trese un aklarashon. Ta parse komo si fuera otro islanan ta haña mas informashon òf mas konkreto ku na Boneiru. For di 13 di yanüari tin e grupo di eksperto di RIVM ta pasando na tur isla i Boneiru ta e último ku nan ta pasa. P’esei ainda no tin masha informashon. Nan ta pasa pa wak si e plan ku kada isla tin ta posibel pa ehekut’é. Ta pasa pa wak e lokalidat i duna e treinen kon tin ku trata ku e bakuna. 28 di yanüari nan ta yega Boneiru pa tuma nota di tur e loke mi a menshoná. Loke si nos por bisa ta; nos ta prepará pa e parti di bakunashon. 25 di yanüari e frizernan spesial a yega Boneiru pa almasenamentu di e bakuna kontra corona. Ta bai usa solamente e bakuna ku ta aprobá. E promé ta e bakuna PfizerBioNTech. Nos no sa ainda si Boneiru ta haña e bakuna Moderna òf e bakuna AstraZeneca ku ainda mester haña aprobashon. Supongamos ku tòg nos haña e bakuna Moderna, e ora ei ya kaba nos tin e frizer. Di e manera ei nos ta bon prepará pa tur posibilidat. Otro kos ku ta importante pa menshoná; ku no ta un obligashon pa un hende tuma e bakuna. E ta liber pa esun ku ta deseá. Pero nos ta bai stimulá pa mas tantu hende posibel tuma e bakuna. Nos ta trahando huntu ku dòkternan di kas pa asina por atendé ku e parti i bakunamentu di hende na 3 diferente sitio. E enfermera ta risibí e bakuna na Fundashon Mariadal, miéntras habitantenan ta na; Rincon i posiblemente na Kompleho deportivo Jorge Nicolaas na Kaya Amsterdam. Despues ku inspektá e sitionan, ta konfirmá i publiká esaki.  

Médikonan profeshonal ta bai bakuná e persona. Ta bai hasi esaki bou di supervishon di un dòkter. Momentu ku ta bai kuminsá registrá ,ta anunsiá pa un hende por bai un sitio pa tuma e bakuna. Denter di poko ta sali un enkuesta pa nos haña un indikashon; kuantu hende ta deseá pa tuma e bakuna i kontesta posibel preguntanan relashoná ku e bakunamentu, pa nan tin mas siguransa di esaki.  

E bakunashon ta bai den fase na Boneiru. ,,Den e promé fase ta bakuná hende di 70 aña bai ariba i personal den kuido. Despues di esei hende di 60  te ku 70 aña ta na bùrt i hende ku ta den un grupo di riesgo. Por ehèmpel hende ku tin un malesa kardio vaskular, malesa di pulmon òf malesa di suku. Despues ta bakuná hende salú for di 18 aña te 60 aña.

Pa loke ta trata e otro kosnan entre otro apelashon pa pakete di kuminda, yudansa pa paga WEB i e parti di studiantenan, ta bai tin informashon pronto. E hendenan ku no ta haña entrada mas, por hasi un apelashon serka nos direktorado Komunidat di Kuido pasobra esaki ta sigui normal”, diputado Nina den Heyer a bisa.

Share This
error: Content is protected !!