KRALENDIJK – Partido UPB ta bai kampañá pa Sekretario di Estado Raymond Knops. E Minister ta kandidato number sinku riba e lista di Partido CDA pa elekshon di Tweedekamer dia 17 di mart benidero.

“Raymond Knops a hasi hopi kos bon pa Boneiru. Komo diputado mi tabata tin hopi kontakto kune den e último sinku aña nan tras di lomba. E tin un amor pa nos isla i ta deseá e mihó pa e boneriano. Sinseramente su kompromisonan hasí durante di su bishitanan di trabou e no ta papia ku Mandatario òf Polítiko so, pero semper a krea tempu pa papia ku personanan den komunidat, siudadanonan i empresarionan i pa bishitá proyektonan.” segun lider di partido UPB, señor James Kroon.

“Bo sa kiko bo tin na dje. E por ta hopi skèrpi ora ta nesesario. Tin biaha esei mester pa e kosnan por kana. Mira por ehèmpel e “Bestuursakkoord”. Sin dje, esaki nunka lo a kristalisá. Raymond Knops a pone tambe ku e otro Ministernan i Sekretario di Estadonan a bini huntu pa eksperensia pa nan mes i mira ku nan propio wowo kon akinan ta i kiko ta nesesario pa mehorá e bida na Boneiru.”

Semper a eksistí un laso amistoso entre UPB i CDA. Ámbos partido ta kompartí e prinsipio demókrata kristian i ta pará pa norma i balor. For di e tempu ku e boneriano por a vota pa “Tweedekamer” (2010) UPB ta kampañando pa CDA. “Den e programa di akshon ta pará ku lo tin rèspèt pa e islanan di Caribe. Tin hopi bon ideanan mas den dje. Nos komo Partido UPB ta konsehá pa: vota pa Raymond Knops, pasombra el a hasi hopi pa Boneiru “, Segun señor Kroon.

Na e elekshon di “Tweedekamer” na aña 2017 e partisipashon di Hulanda karibense tabata ménos ku 24%. “Mi ta spera ku e biaha aki Pueblo di Boneiru sali i bai vota. Pasombra loke nan ta diskutí i disidí den “Tweedekamer” tin un impakto direkto den nos bida. Si nos no laga nan skucha nos bos, nan lo no por tin oido pa nos. P’esei mi ta konsehá pueblo boneriano pa hasi uzo di nos derecho demokrátiko i pa vota kandidato number sinku riba lista di partido CDA.”

Share This
error: Content is protected !!