KRALENDIJK – Direktiva di ‘Parke Tului’ tin algun meta pa organisá diferente aktividat durante 2021. E deseo ta pa organisá 4 aktividat na ‘Parke Tului’, den e promé kuartal. Presidente di ‘Parke Tului’ , sra. Caroline Domacassé ta menshoná loke nan tin planiá pa 2021 den e parke menshoná.    

“Nos ta tene kuenta ku Covid-19 i tambe e kantidat di hende ku por ta presente, p’esei kisas e aktividat no ta tuma lugá manera nos a plani’e, sinembargo nos ke hasié mas despues.  

1)  

Nos ke organisá un atardi di sine pa nos muchanan te ku 10 aña, ku algu di bebe i pòpkòrn, p’esei mi ke puntra si tin algun hende ku por sugerí algun pelíkula ku ta prèt i edukativo ku nos por skohe pa e atardi aki.  

2)   

Nos ke aserka kualke organisashon ku tin idea òf ta miembro di un organisashon di dominó ku ta haña ta interesante pa por organisá un anochi di dominó pa e timnan.  

3)   

Un atardi / anochi ku algun tènt ku kos di bende (preferibel) kos di laman / por ehèmpel pastechi di piská / tuna / balchi piská / sòpi piská / si tin persona ku ke bende mata, joya, bar i kos di boka dushi.  

4)   

Un anochi kaminda nos ke bini ku un hende pa konta / historia di nos bario.  

Esunnan ku tin idea di algun pelíkula ku nos por skohe, un tim di dominó ku tin idea i huntu ku nos ke hasi esaki, doñonan ku lo ke bende algu, por tuma kontakto ku ami na number di telefòn 796-7272 ”, Caroline Domacassé ta informá.   

Share This
error: Content is protected !!