KRALENDIJK – Suidadano Arthur Sealy den un komunikado pa prensa ta papia tokante informashon ku resientenemente e komishon di COVID-19 di Konseho Insular a haña, relashoná ku Coronavírùs i e bakuna. “Un delegashon di RIVM a bishitá Bonaire i pa medio di señor Sprenger, a duna informashon tokante Covid -19 na komishon di Konseho Insular riba djabièrnè, 29 di yanüari, atardi. Mirando e dia, orario i idioma mi pregunta ta; e informashonnan a alkansá e pueblo? Un otro pregunta. Ta bai prosesá e informashonnan pa pone pueblo na altura kiko ta bai pasa? E liña kòrá ta, ku ta kuminsá bakuná 15 di febrüari, pues aki dos siman i promé ku temporada di orkan ku ta kuminsá na yüni, 85% di e poblashon mester ta bakuná inkluso tur ku tabatin covid-19. Ta importante pa pueblo ta na altura pa medio di un kampaña di informashon. A bini dilanti ku tin skarsedat di bakuna i ku ta na momentu ku a bakuná 2 biaha por kuminsá suavisá e medidanan. Ta nifiká ku mester sigui; laba man ku habon, tene distansia di un meter sinkuenta, no aglomerá i ounke tapaboka no ta obligatorio ta rekomendabel pa us’é. Kòrda ku no ta obligatorio pa tuma bakuna. Gobièrnu pa medio di un ofisina ta reklutá trahadó pa yuda den bakunashon, tin un enkuesta tambe ta tuma lugá pa haña un bista kon pueblo ta pensa. Si ta solamente 20% a tèst i e kantidat di persona kontagiá ta bou por reina e pensamentu ku Bonaire ta o.k i ku mester suavisá e medidanan i habri porta. Esaki no ta kuadra ku realidat. Un sugerensia mi tin. Buska algun influencier i víktima di Covid pa medio di mensahe na medionan di komunikashon i media sosial, influensiá pueblo pa bai tuma bakuna. Laga nos ta konsiente ku ta nos mester aportá pa Bonaire subi e kaminda den un direkshon nobo ku hende salú i motivá. Ekonomia i e bida sosial ta haña forma nobo ora pueblo ta protehé i tin un resistensia haltu. Ban mustra mundu, nos tin union (Tumba di Bòy Dap)”, Arthur Sealy a bisa. 

Share This
error: Content is protected !!