KRALENDIJK – Pader Marc Hooijschuur a yega Boneiru i tantu djasabra pero tambe djadumingu el a selebrá Santu Sakrifisio di misa. Djadumingu, tabata un momentu spesial kaminda a presentá e pader nobo pa Parokia La Bírgen di Coromoto na Antriol. Pader Baak a selebrá último Santu Sakrifisio di misa ku parokianonan i el a bai biba Kòrsou. Pader Marc Hooijschuur no por a yega Boneiru pa kontinuá ku Santa Eukarestia na Boneiru 14 di yanüari pa motibu ku el mester a bai den karentena. Danki Dios su resultado tabata negativo. “Porfin mi tei i apesar ku un pia ainda ta na Kòrsou, pronto huntu ku boso mi ta hala e otro pia pone na Boneiru”, pader Marc a bisa durante misa.  

Promé ku misa a kuminsá, pader vikario episkopal Santiago Malagon a entrodusí pader Marc Hooijschuur i presenté komo e pader ku ta enkargá ku parokia La Bírgen di Coromoto. El a resa un karta ku Obispu di Willemstad Luis Antonio Secco, a manda. “Pa grasia di Dios i Sede Apostóliko Obispu di  Willemstad, na nos ruman stimá den Kristu presbitero Marcus Hooijschuur, Pas di Señor sea ku bo. Pa promové bienestar pastoral di nos Iglesia lokal, mi ta nombrá bo komo pastor di parokia ‘La Bírgen di Coromoto’, na Antriol Boneiru, pa un aña, pa ehersé bo saserdotal i apostolado ku tur derecho i deber ku lei Kanóniko (CIC cann.539-540) i normanan diosesano ta preskribí. E nombramentu a drenta na vigor dia 14 di yanüari 2021, deseando hopi fruta den bo ministerio pastoral pa bo mes i pa nos Diosisis.” 

Esaki ta loke pader Vikario Santiago a lesa i despues a kontinuá ku Santu Sakrifisio di misa. Pader Marc durante predikashi djasabra anochi, entre otro a menshoná,  ku ya e tabata na Boneiru den pasado pa fakansi i awor pa biba. “Mi tabata aki ku fakansi i awor tei pa biba. Pader Alphonsus Baak a laga un misa bunita i tur kos bon organisá. Pader Baak i ami a pasa e mes un kaminda komo seminarista i awor ya mi tin 22 aña komo saserdote. Mi tin e tarea tambe awor komo kapalan di prison. Awor mi ta na Boneiru i meskos ku tin ‘navigater’ pa sa unda nos ke yega, beibel ta nos ‘navigator’ pa nos yega na pas entre otro. Hesus ta nos kaminda”, pader a bisa. Riba potrèt durante misa di ayera mainta. 

Share This
error: Content is protected !!